Í síðustu umferð Domino‘s deildar kvenna í körfuknattleik fyrir jólafrí mættust nýliðar Skallagríms og Njarðvíkur. Leikið var suður með sjó og hafði Skallagrímur betur, 72-78 en lokatölur leiksins gefa þó ekki rétta mynd af yfirburðum Skallagrímskvenna í leiknum. Snemma lögðu þær grunn að sigrinum og það var ekki fyrr en í lokin að Njarðvík tók að minnka muninn.

Jafnt var á með liðinum í blábyrjun leiksins en síðan ekki söguna meir. Skallagrímskonur settu í fluggírinn í stöðunni 6-6, hertu varnarleik sinn til muna og sýndu hvílík gæða búa í liðinu á góðum degi. Þær kafsigldu Njarðvík það sem eftir lifði fyrsta leikhluta og að honum loknum höfðu þær tíu stiga forskot, 11-21. Þær héldu síðan uppteknum hætti í öðrum fjórðungi. Heimakonur áttu engin svör við varnarleik Skallagríms og köstuðu boltanum ítrekað frá sér. Skallagrímskonur fengu því auðveld stig úr hraðaupphlaupum en auk þess nýttu þær skotin sín vel. Þær voru einfaldlega miklu betri í fyrri hálfleik, mun ákveðnari og leiddu mjög afgerandi í hálfleik, 26-47.

Leikmenn Njarðvíkur mættu mun ákveðnari til síðari hálfleiks, tóku á sig rögg í vörninni og náðu aðeins að minnka muninn. Skallagrímskonur voru ef til vill orðnar örlítið værukærar en engu að síður höfðu þær 19 stiga forystu fyrir lokafjórðunginn og voru með unninn leik í höndunum. Njarðvíkingar héldu áfram að kroppa aðeins af forskotinu í lokafjórðungnum. Skallagrímur svaraði þó fyrir sig og náði 20 stiga forskoti á tímabili en heimaliðið var mun sterkara á lokamínútum leiksins þar sem þær skoruðu 19 stig gegn aðeins fimm stigum Skallagríms. Það dugði þó ekki til neins nema minnka muninn því Skallagrímur sigraði með sex stigum, 72-78.

Tavelyn Tillman var atkvæðamest í liði Skallagríms með 31 stig en Cameron Tyson-Thomas gerði 36 stig fyrir gestina. Sökum bilunar í tölfræðiskráningu KKÍ er ítarlegri tölfræði ekki aðgengileg og er beðist velvirðingar á því.

Sigur Skallagríms gerir það að verkum að liðið heldur þriðja sæti deildarinnar yfir hátíðirnar. Liðið hefur 18 stig eftir 13 leiki, jafn mörg og Snæfell í sætinu fyrir ofan en fjórum stigum á undan Stjörnunni sem situr í fjórða sæti.

Næst leikur Skallagrímur laugardaginn 7. janúar næstkomandi þegar liðið tekur á móti Val í Borgarnesi.

Skallagrímur gerði út um leikinn í fyrri hálfleik