Skagamenn fóru vestur til Ísafjarðar síðastliðinn föstudag og mættu liði Vestra í 1. deild karla í körfuknattleik. Eftir að nokkuð jafnræði hafði verið með liðunum framan af leik stungu heimamenn af um miðjan annan fjórðung og unnu að lokum stórsigur, 103-63.

Vestramenn byrjuðu betur en ÍA minnkaði muninn í eitt stig um miðjan upphafsleikhlutann. Leikurinn var nokkuð jafn eftir það, en heimamenn höfðu þó heldur yfirhöndina og leiddu með þremur stigum eftir fyrstu tíu mínúturnar. Þeir juku síðan forskot sitt í sex stig í upphafi annars fjórðungs en Skagamenn spyrntu við fótum, reyndu að halda í við heimamenn og minnkuðu muninn í fjögur stig. Það var síðan um miðjan annan leikhluta að heimamenn gáfu allt í botn og stungu af. Þeir skoruðu hverja körfuna á fætur annarri og Skagamenn áttu engin svör. Í hléinu munaði 18 stigum á liðunum, Vestri leiddi 48-30 og heimamenn komnir í ansi hreint vænlega stöðu.

Leikmenn ÍA náðu ekki að svara fyrir sig og koma til baka í síðari hálfleik. Vestramenn juku forskot sitt lítillega í þriðja leikhluta og bættu enn við í lokafjórðungnum. Þegar leiktíminn hafði runnið sitt skeið á enda var forskot þeirra orðið 40 stig. Þeir sigruðu með 103 stigum gegn 63.

Derek Shosue skoraði 23 stig fyrir ÍA og tók níu fráköst. Sindri Leví Ingason skoraði 11 stig og Sigurður Rúnar Sigurðsson var með tíu stig og sjö fráköst en aðrir höfðu minna.

Skagamenn sitja í áttunda og næstneðsta sætinu með sex stig þegar deildin fer í jólafrí, fjórum stigum frá næstu liðum fyrir ofan en vel á undan stigalausu botnliði Ármanns. Fyrsti leikur ÍA á nýja árinu verður einmitt gegn botnliðinu, en hann verður leikinn fimmtudaginn 5. janúar í íþróttahúsinu við Vesturgötu á Akranesi.

kgk

Skagamenn fengu skell fyrir vestan