Síðasta umferð Domino‘s deildar karla í körfuknattleik fyrir jólafrí var leikin í gærkvöldi. Botnlið Snæfells tók á móti nýliðum Þórs frá Akureyri. Gestirnir höfðu yfirhöndina allan leikinn og ekki fyrr en í lokafjórðungnum að Snæfellingar komust á almennilegt skrið og í námunda við gestina. En það var heldur seint í rassinn gripið og voru það því Þórsarar sem fóru með sigur af hólmi, 92-102.

Gestirnir byrjuðu af krafti og náðu yfirhöndinni snemma leiks, höfðu sjö stiga forystu eftir aðeins þrjár mínútur og leiddu með tíu stigum eftir upphafsfjórðunginn, 23-33. Áfram voru gestirnir sterkari og leiddu með allt að tíu stigum framan af öðrum leikhluta. Þeir stigu síðan örlítið á bensínið allt til loka hálfleiksins og leiddu með 14 stigum í hléinu, 40-54.

Gestirnir voru sömuleiðis heldur ákveðnari í upphafi síðari hálfleiks og um miðjan þriðja fjórðung varð mestur munur á liðunum, en Þór leiddi þá með 28 stigum. Snæfellingar tóku aðeins við sér og minnkuðu muninn í 20 stig fyrir lokafjórðunginn. Það var síðan í upphafi hans að var sem þrýst hefði verið á einhvern rofa hjá heimamönnum. Þeir áttu mjög góðan leikkafla og náðu snarlega að minnka muninn niður í tólf stig og síðan hægt og rólega í sjö stig þegar fjórar mínútur lifðu leiks. Nær komust þeir hins vegar ekki og gestirnir höfðu að lokum tíu stiga sigur, 92-102.

Sefton Barrett var atkvæðamestur Snæfells með 29 stig og 16 fráköst. Næstur honum kom Andreé Fares Michelsson með 19 stig og þeir Þorbergur Helgi Sæþórsson, Árni Elmar Hrafnsson og Sveinn Arnar Davíðsson skoruðu níu stig hver.

Úrslit leiksins þýða að Snæfell er enn án sigurs á botni deildarinnar, átta stigum á eftir næstu liðum. Jólafrí er skollið á í Domino‘s deild karla og Snæfell leikur því næst á nýja árinu þegar liðið tekur á móti ÍR fimmtudaginn 5. janúar næstkomandi.

Snæfell fer stigalaust í jólafrí