Skallagrímur mætti Grindavík í síðustu umferð Domino‘s deildar karla í körfuknattleik fyrir hátíðirnar. Leikið var í Borgarnesi í gær. Grindvíkingar náðu forystunni snemma leiks og leiddu nánast allan leikinn og þó Skallagrímsmenn hafi sjaldnast verið langt undan þá náðu þeir sér einhvern veginn aldrei almennilega á strik. Að lokum fór svo að gestirnir höfðu sigur, 80-95 og Skallagrímur verður því um miðja deild yfir jólin.

Jafnræði var með liðunum í upphafi leiks en Grindvíkingar höfðu þó heldur yfirhöndina og leiddu eftir fyrsta leikhluta, 23-26. Skallagrímsmenn svöruðu fyrir sig í öðrum fjórðungi og jöfnuðu þegar hann var hálfnaður. Grindvíkingar tóku aftur forystuna en Skallagrímsmenn luku fyrri hálfleik af krafti og komust yfir. Þeir leiddu með einu stigi í hléinu, 43-42.

Grindvíkingar komust yfir á nýjan leik strax eftir hléið og leikurinn var mjög jafn og spennandi þar sem gestirnir leiddu með örfáum stigum þar til seint í þriðja leikhluta. Þá tóku þeir góðan sprett og náðu tíu stiga forskoti fyrir lokafjórðunginn, 60-70. Skallagrímsmenn náðu ekki að svara fyrir sig í fjórða leikhluta og gestirnir höfðu nokkuð þægilega forystu allt til loka. Þegar leiktíminn var liðinn munaði 15 stigum á liðunum, Grindvíkingar sigruðu 80-95.

Flenard Whitfield fór fyrir liði Skallagríms með 28 stig og 15 fráköst. Næstur honum kom Darrell Flake með 19 stig og sex fráköst og Sigtryggur Arnar Björnsson lauk leik með 16 stig og sex stoðsendingar en aðrir höfðu minna.

Úrslit leiksins þýða að Skallagrímur mun sitja í sjötta sæti deildarinnar á meðan deildin er í jólafríi. Liðið hefur tíu stig, jafn mörg og Þór Þorlákshöfn og Keflavík í sætunum fyrir neðan en tvö stig eru í Þór Akureyri í sætinu fyrir ofan.

Skallagrímur leikur næst á nýju ári, fimmtudaginn 5. janúar, þegar liði tekur á móti Haukum í Borgarnesi.

Náðu sér aldrei almennilega á strik