Knattspyrnufélag ÍA gekk nýverið frá samningum við þrjá leikmenn; miðjumennina Guðmund Böðvar Guðjónsson og Iain Williamson og sóknarmanninn Stefán Ómar Magnússon, en þeir fyrrnefndu eru stuðningsmönnum félagsins kunnir.

Guðmundur Böðvar lék með ÍA seinni hluta síðasta sumars á láni frá Fjölni, þar sem hann hefur verið síðan 2013. Hann eru uppalinn hjá ÍA og lék sinn fyrsta leik með liðinu árið 2006 og hefur alls leikið 162 leiki fyrir félagið og skoraði í þeim fjögur mörk.

Iain Williamson kom fyrst til reynslu hjá ÍA árið 2012 en lék síðan með liðinu á láni frá Víkingum á liðnu sumri. Hann hefur nú gengið formlega til liðs við ÍA og samdi til loka næsta keppnistímabils. „Iain styrkti liðið gríðarlega þegar hann kom í byrjun maí til liðsins og lék alls 20 leiki á tímabilinu,“ segir í tilkynningu frá ÍA. Jón Þór Hauksson, aðstoðarþjálfari félagsins, kveðst ánægður með að hafa samið við miðjumennina tvo, Iain og Guðmund Böðvar. „Iain kom virkilega sterkur inn hjá okkur á erfiðum tíma í maí eftir slakt gengi. Hann kom og bætti leik liðsins ásamt því að vera frábær liðsmaður. Sama má segja um Gumma sem kom til liðs við okkur í sumarglugganum á láni frá Fjölni. Við höfum fylgst vel með honum undanfarin ár og það er ekkert leyndarmál að við höfum haft áhuga á að endurheimta hann aftur í ÍA. Gummi hefur þróað sinn leik vel hjá Fjölni. Við erum gríðarlega ánægðir með að hann hafi nú samið við okkur,“ segir Jón Þór. Sömuleiðis segist Guðmundur Böðvar vera ánægður með að hafa leikið með ÍA á síðari hluta sumarsins sem leið. „Ég er með mikinn metnað fyrir klúbbnum og hlakka til þess sem framundan er. Við eigum öll fullt inni,“ segir hann. Þá lætur Iain vel af klúbbnum og segist hlakka til komandi tíma með Akranesliðinu. „Ég var ánægður með tímabilið í sumar og hlakka til að byggja ofan á það sem við gerðum þá. Ég var einnig mjög ánægður með allt hjá klúbbnum þannig að það var auðveld ákvörðun að ganga til liðs við ÍA,“ segir Iain.

Ungur og efnilegur sóknarmaður

Sömuleiðis hefur samið við ÍA sóknarmaðurinn Stefán Ómar Magnússon. Hann er ungur og efnilegur leikmaður, aðeins 16 ára gamall og hefur undanfarin ár leikið með liði Hugins á Seyðisfirði. Spilaði hann sína fyrstu leiki með meistaraflokki Seyðisfjarðarliðsins sumarið 2015, þá aðeins 15 ára gamall og hjálpaði liðinu við að komast í 1. deild. Leikirnir urðu sex talsins þetta fyrsta sumar hans og skoraði hann í þeim eitt mark. Á síðasta keppnistímabili var hann fastamaður í liðinu, lék 21 leik og skoraði í þeim fjögur mörk en Huginn féll úr 1. deildinni eftir dramatíska lokaumferð. Gunnlaugi Jónssyni þjálfara ÍA líst vel á unga framherjann. „Þetta er mjög kröftugur og vinnusamur sóknarmaður sem á eftir að smellpassa í umhverfið hjá okkur. Þrátt fyrir að vera kornungur hefur hann talsverða reynslu úr meistaraflokksbolta og okkur hlakkar til að vinna með honum og þróa enn frekar.“

ÍA hefur samið við þrjá leikmenn