Gunnhildur Gunnarsdóttir, fyrirliði Snæfells, var valin körfuknattleikskona ársins 2016 þegar KKÍ valdi körfuknattleiksfólks ársins, en valið hefur verið tvískipt síðan árið 1998. Gunnhildur var fyrirliði Snæfells sem vann tvöfalt, bæði Íslands- og bikarmeistaratitil, á síðasta keppnistímabili og jafnframt þriðja Íslandsmeistaratitilinn í röð. Þá er hún einn mikilvægasti leikmaður íslenska landsliðsins og hefur verið um nokkurt skeið. „Með óbilandi baráttu og dugnaði sé hún ómissandi bæði fyrir landsliðið og félagslið sitt,“ segir í rökstuðningi með útnefningunni. „Þá var Gunnhildur ofarlega á tölfræðilistum deildarinnar í helstu tölfræðiþáttum á síðastliðnu tímabili og í úrvalsliði ársins á lokahófi KKÍ auk þess að hún var kjörin „varnarmaður ársins“ í deildinni. Á þessu tímabili hefur Gunnhildur byrjað vel í deildinni hér heima og er meðal bestu íslensku leikmanna deildarinnar í öllum tölfræðiþáttum. Gunnhildur hefur leikið alla landsleiki íslenska liðsins frá árinu 2012, eða 27 leiki samtals.“

Í öðru sæti í valinu á körfuknattleikskonu ársins hafnaði Helena Sverrisdóttir, körfuknattleikskona ársins undanfarin ellefu ár og Borgnesingurinn Sigrún Sjöfn Ámundadóttir, leikmaður Skallagríms, hafnaði í þriðja sæti.

Martin bestur karla

Martin Hermannsson, leikmaður franska liðsins Étoile de Charleville-Mézéres, var útnefndur körfuknattleikskarl ársins. Hann lék síðasta tímabil með LIU Brooklyn-háskólanum í NCAA háskóladeildinni bandarísku þar sem hann hlaut viðurkenningar fyrir frammistöðu sína. Hann lék alla leiki íslenska landsliðsins á liðnu sumri og hjálpaði liðinu að tryggja sér sæti á Evrópumótinu á næsta ári. Fékk hann mikið lof fyrir frammistöðu sína með landsliðinu og hélt á haustmánuðum í atvinnumennsku í Frakklandi. Er hann einn af bestu leikmönnum liðs síns sem situr öðru sæti deildarinnar þegar þessi orð eru rituð. „Martin er orðin einn af betri leikmönnum íslenska landsliðsins á sínu 22. aldursári og einn af framtíðarburðarásum landsliðsins,“ segir meðal annars í rökstuðningi.

Í öðru sæti í valinu á körfuknattleikskarli ársins hafnaði Jón Arnór Stefánsson, leikmaður KR og Grundfirðingurinn Hlynur Bæringsson, leikmaður Stjörnunnar, hafnaði í því þriðja.

Gunnhildur er körfuknattleikskona ársins 2016