ÍA tók á móti toppliði Hattar í 1. deild karla í körfuknattleik á föstudag og urðu að játa sig sigraða gegn sterku liði Hattarmanna. Gestirnir voru betri frá fyrstu mínútu og unnu að lokum öruggan sigur, 66-104.

Höttur náði yfirhöndinni snemma leiks og hafði átta stiga forystu eftir upphafsfjórðunginn, 16- 24. Þeir bættu lítillega við í upphafi annars leikhluta og leiddu örugglega meira og minna allan fjórðunginn. Hattarmenn höfðu 13 stiga forystu stóran hluta fjórðungsins en Skagamenn náðu ekki að saxa á forskotið. Skömmu fyrir hléið tóku gestirnir smá sprett og juku muninn í 18 stig áður en flautað var til hálfleiks, 34-52.

Gestirnir héldu síðan uppteknum hætti í upphafi síðari hálfleiks, bættu við forskot sitt og áður en langt um leið var munurinn orðinn 21 stig. Skagamenn náðu aðeins að klóra í bakkann en ekkert meira en það undir lok þriðja leikhluta og 17 stigum munaði á liðunum fyrir lokafjórðunginn, 54-71. Fjórði og síðasti leikhluti var fremur tíðindalítill. Úrslit leiksins voru ráðin og liðin nýttu tækifærið og leyfðu yngri og óreyndari leikmönnum að spreyta sig. Það var ekki fyrr en á síðustu þremur mínútunum að gestirnir áttu stórgóðan kafla og breyttu 22 stiga forskoti í 38 áður en leikurinn var úti. Lokatölur á Akranesi 66-104, Hetti í vil.

Derek Shouse og Áskell Jónsson skoruðu 14 stig hvor fyrir ÍA en Derek gaf átta stoðsendingar að auki og gaf sjö fráköst. Sigurður Rúnar Sigurðsson skoraði 12 stig og Karvel Lindberg Karvelsson var með tíu stig og tók sex fráköst.

ÍA situr í áttunda og næstneðsta sæti deildarinnar með sex stig og ellefu spilaða leiki, tveimur stigum á eftir Hamri og Vestra í sætunum fyrir ofan. Næsti leikur liðsins er einmitt gegn Vestra og verður hann leikinn á Ísafirði föstudaginn 16. desember næstkomandi.

Toppliðið of stór biti fyrir Skagamenn