Íslandsmeistarar Snæfells mættu Stjörnunni í Domino‘s deild kvenna á laugardag. Pálína Gunnlaugsdóttir er fjarri góðu gamni vegna meiðsla, en meiðsli sem hún varð fyrir í landsleik Íslands og Slóvakíku í byrjun nóvember tóku sig upp að nýju. Mun hún af þeim sökum hvíla þar til á nýja árinu.

En leikurinn á laugardag fór fram í Garðabæ og þar þurftu Snæfellskonur að játa sig sigraðar gegn Stjörnuliði sem lék afar góðan varnarleik allt frá fyrstu mínútu til leiksloka. Lagði það grunn að sigri þeirra.

Stjarnan mætti mun ákveðnari til leiks og náði forystunni strax í upphafi. Snæfellskonur komust ekki í gang fyrr en eftir miðjan upphafsfjórðunginn en enduðu leikhlutann af krafti og minnkuðu muninn í eitt stig, 14-13. Eftir það var leikurinn í járnum. Stjarnan náði þriggja stiga forskoti í upphafi annars leikhluta áður en Snæfell svaraði fyrir sig og komst sömuleiðis í þriggja stiga forystu. Stjarnan átti næsta leik, tók forystuna að nýju en Snæfellskonur áttu síðasta orðið í fyrri hálfleik og leiddu með þremur stigum í hléinu, 30-27.

Stjarnan minnkaði muninn í eitt stig í upphafi síðari hálfleiks en Snæfell stóðst áhlaupið að sinni. Um miðbik þriðja leikhluta var baráttan farin að harðna og liðin skiptust einu sinni á forystunni áður en Stjörnukonur náðu góðum leikkafla og sex stiga forskoti fyrir lokafjórðunginn, 44-38. Snæfell minnkaði muninn í upphafi fjórða leikhluta en Stjarnan svaraði fyrir sig og náði mest átta stiga forskoti. Snæfellskonur gerðu lokaatlögu að forystu heimaliðsins seint í leiknum. Þær minnkuðu muninn í eitt stig 53-52 þegar tvær mínútur lifðu leiks og mikil spenna farin að færast í leikinn. Nær komust þær hins vegar ekki og Stjarnan innsiglaði mikinn vinnusigur af vítalínunni á lokamínútunum, 60-52.

Aaryn Ellenberg-Wiley var atkvæðamest leikmanna Snæfells með 26 stig, fimm fráköst og fjóra stolna bolta. Andrea Björt Ólafsdóttir og Berglind Gunnarsdóttir skoruðu sjö stig, Gunnhildur Gunnarsdóttir var með fimm stig og sjö fráköst, Helga Hjördís Björgvinsdóttir skoraði fimm stig einnig og Alda Leif Jónsdóttir skoraði tvö en aðrar komust ekki á blað.

Snæfell situr í öðru sæti deildarinnar með 16 stig eftir tólf leiki, jafn mörg og Skallagrímur í sætinu fyrir neðan en fjórum stigum á eftir toppliði Keflavíkur. Næst leikur Snæfell í Stykkishólmi laugardaginn 17. desember næstkomandi.

Snæfellskonur urðu að játa sig sigraðar gegn Stjörnunni