Skallagrímur fór suður til Þorlákshafnar að kvöldi föstudags og mætti Þór í Domino‘s deild karla í körfuknattleik. Leikurinn var jafn og spennandi að heita frá upphafi til enda en eftir dramatískar lokamínútur voru það Skallagrímsmenn sem höfðu tveggja stiga sigur, 74-76. Skallagrímur hefur unnið fjóra af síðustu fimm leikjum sínum og er liðið komið á gott skrið í deildinni.

Mikið jafnræði var með liðunum í upphafi leiks og í fyrsta leikhluta skildu mest þrjú stig á milli liðanna þegar heimamenn leiddu eftir fimm mínútna leik. Eftir það jöfnuðu Borgnesingar og komust síðan yfir og höfðu eins stigs forskot eftir upphafsfjórðunginn, 15-16. Skallagrímsmenn höfðu yfirhöndina í öðrum leikhluta og leiddu allt til hálfleiks en heimamenn í Þór voru þó aldrei langt undan. Forysta Skallagríms var aldrei nema fjögur til fimm stig og þeir leiddu með 34 stigum gegn 39 í hálfleik.

Það sama var uppi á teningnum í upphafi síðari hálfleiks. Skallagrímsmenn höfðu yfirhöndina og um miðjan þriðja leikhluta voru þeir komnir með átta stiga forskot. Þá minnkuðu Þórsarar muninn en Skallagrímsmenn komu honum snarlega upp í tíu stig en heimamenn áttu lokakörfu leikhlutans og leiddu 55-63 fyrir lokafjórðunginn. Þar tóku Þórsarar góðan sprett, minnkuðu muninn með hverri körfunni á fætur annarri og jöfnuðu um miðjan leikhlutann í 69-69. Upphófust þá æsispennandi lokamínútur. Heimamenn komust yfir og höfðu fjögurra stiga forskot þegar tvær mínútur lifðu leiks. En Skallagrímsmenn áttu lokaorðið í leiknum. Þeir jöfnuðu í 73-73 þegar aðeins mínúta var eftir og voru komnir tveimur stigum yfir, 74-76, skömmu síðar. Heimamenn fengu eitt tækifæri að lokum til að tryggja sér sigurinn með lokasókn leiksins en þriggja stiga skot þeirra geigaði. Skallagrímur landaði þar með góðum tveggja stiga sigri eftir dramatískar lokamínútur og gott gengi liðsins í deildinni upp á síðkastið heldur áfram.

Flenard Whitfield var atkvæðamestur Skallagrísmanna í leiknum með 21 stig, 16 fráköst og fjórar stoðsendingar. Magnús Þór Gunnarsson skoraði 13 stig og Darrel Flake var með ellefu stig og sex fráköst en aðrir höfðu minna.

Með sigrinum á Þór lyfti Skallagrímsliðið sér upp í fimmta sæti deildarinnar og hefur tíu stig eftir fyrstu tíu leiki vetrarins, jafn mörg stig og Þór Ak. í sætinu fyrir neðan. Síðasti leikur Skallagríms fyrir jólafrí fer fram fimmtudaginn 15. desember næstkomandi þegar Grindvíkingar sækja Borgarnes heim.

Skallagrímssigur eftir dramatískar lokamínútur