Skallagrímur og Haukar mættust í Domino‘s deild kvenna í körfuknattleik á laugardag. Leikið var að Ásvöllum og skemmst er frá því að segja að Skallagrímskonur gerðu afar góða ferð í Hafnarfjörðinn. Þær gersamlega völtuðu yfir Haukaliðið sem virtist aldrei hafa haft trú á verkefninu. Það var sama til hvaða þáttar leiksins var litið, hvergi komust Haukar með tærnar þar sem Skallagrímskonur höfðu hælana. Sigur Skallagrímskvenna varð því gríðarstór og aðeins munaði tveimur stigum að þær hefðu skorað tvöfalt fleiri stig en heimaliðið. Lokatölur í Hafnarfirði urðu 38-74.

Snemma leiks varð ljóst að stefndi í sigur Skallagrímskvenna. Þær náðu yfirhöndinni fyrir miðjan upphafsfjórðunginn og höfðu átta stiga forystu að honum loknum, 14-22. Það var síðan strax í öðrum leikhluta að þær gerðu út um leikinn. Haukakonur skoruðu aðeins fjögur stig það sem eftir lifði fyrri hálfleiks og á meðan stakk Skallagrímsliðið af. Um miðbik annars fjórðungs var forskot þeirra orðið 16 stig og þær leiddu síðan með 20 stigum í hálfleik, 18-38 og heldur betur orðið á brattann að sækja fyrir heimaliðið.

Framan af síðari hálfleik bættu leikmenn Skallagríms lítillega við forskot sitt í rólegheitum og leiddu með 26 stigum fyrir lokafjórðunginn, 28-54. Í fjórða og síðasta leikhluta tók Skallagrímur síðan aðra rispu og gegn áhugalausu Haukaliði og vann að lokum stórsigur, 38-74 og munaði aðeins hársbreidd að þær næðu að tvöfalda stigaskor heimaliðsins.

Tavelyn Tillman var stigahæst leikmanna Skallagríms með 24 stig og stal hún fimm boltum að auki. Kristrún Sigurjónsdóttir var með 16 stig, átta fráköst og sex stoðsendingar og Sigrún Ámundadóttir skoraði tólf stig og tók 16 fráköst.

Skallagrímur situr í þriðja sæti deildarinnar með 16 stig eftir tólf leiki, jafn mörg stig og Snæfell í sætinu fyrir ofan og fjórum stigum á eftir Keflavík sem trónir á toppnum. Þá eru fjögur stig niður í fjórða sætið sem Stjarnan skipar.

Síðasti leikur Skallagríms fyrir jólafrí fer fram laugardaginn 17. desember næstkomandi þegar liðið heimsækir Njarðvík.

Skallagrímskonur gersigruðu Hauka