Botnlið Snæfells mætti KR í Domino‘s deild karla í körfuknattleik í gær. Leikið var í Vesturbæ Reykjavíkur og skemmst er frá því að segja að leikmenn Snæfells áttu aldrei möguleika gegn Íslandsmeisturunum. Þeir rétt náðu að halda í við KR-inga í upphafi leiksins en eftir það réðu heimamenn gangi leiksins og unnu að lokum sannfærandi sigur, 108-74.

KR-ingar skoruðu fyrstu körfu leiksins og tóku forystuna strax í upphafi. Snæfellingar jöfnuðu í 8-8 og liðin fylgdust að þar til um miðjan upphafsfjórðunginn. Þá höfðu bæði lið skorað tólf stig en þá tóku heimamenn við sér og leiddu með tíu stigum eftir fyrsta leikhluta, 31-21. Leikmenn Snæfells svöruðu aðeins fyrir sig í upphafi annars fjórðungs og minnkuðu muninn í fjögur stig. Þá tóku KR-ingar aftur góðan sprett og höfðu afgerandi 18 stiga forskot í hálfleik, 58-40.

Snæfellingar komu frískir til leiks eftir hléið og áttu ágætan kafla í upphafi síðari hálfleiks. Þeir hjuggu fimm stig af forskoti Íslandsmeistaranna en það dugði skammt. KR-ingar svöruðu í sömu mynt og gott betur en það. Hægt og sígandi bættu þeir hverju stiginu á töfluna og leiddu með 26 stigum fyrir lokafjórðunginn, 80-54. Úrslit leiksins voru ráðin og Íslandsmeistararnir sigldu að lokum heim 34 stiga sigri, 108-74.

Sefton Barrett fór fyrir Snæfellsliðinu með 20 stig, fráköst og fimm stolna bolta. Andrée Fares Michelsson skoraði 15 stig, Þorbergur Helgi Sæþórsson tíu en aðrir höfðu minna.

Geta má þess að Borgnesingurinn Pavel Ermolinskij, sem leikur með KR, var hársbreidd frá því að setja upp þrennu í leiknum. Hann gaf 14 stoðsendingar, tók 13 fráköst en vantaði aðeins eitt stig upp á þrennuna. Hann lauk leik með níu stig.

Snæfellsliðið situr enn stigalaust á botni deildarinnar eftir fyrstu tíu leiki vetrarins og róðurinn farinn að þyngjast. Þeir eru sex stigum á eftir Keflvíkingum í sætinu fyrir ofan og átta stigum frá því að lyfta sér upp úr fallsæti. Næsta tækifæri liðsins til að krækja í fyrstu stig vetrarins fá þeir fimmtudaginn 15. desember næstkomandi, þegar liðið tekur á móti Þór Ak. í Stykkishólmi.

Snæfell lá gegn Íslandsmeisturunum