Skallagrímur tók á móti toppliði Keflavíkur í Domino‘s deild kvenna á eitt hundrað ára afmæli félagsins sem fagnað var með pompi og prakt síðastliðinn laugardag. Liðið náði þó ekki að sækja sigur gegn toppliðinu á afmælisdaginn. Eftir góðan fyrri hálfleik Skallagríms tóku gestirnir af Suðurnesjunum öll völd á vellinum í síðari hálfleik og sigruðu að lokum með 68 stigum gegn 55.

Keflvíkingar skoruðu fyrstu körfu leiksins en Skallagrímskonur áttu næstu stig, komust yfir og höfðu yfirhöndina í upphafsfjórðungnum. Þær leiddu að honum loknum með 16 stigum gegn 13. Gestirnir jöfnuðu í upphafi annars leikhluta í 17-17 en aftur tóku Skallagrímskonur stjórn leiksins í sínar hendur og voru sterkara liðið allt til hálfleiks. Mest náðu þær átta stiga forskoti seint í öðrum fjórðungi en leiddu með fimm stigum í hléinu, 34-29.

Keflavíkurkonur komu mjög ákveðnar til síðari hálfleiks. Þær þjörmuðu stíft að Skallagrímsliðinu bæði í vörn og sókn og tóku öll völd á vellinum. Þær komust yfir snemma í þriðja leikhluta og litu aldrei um öxl. Keflavík hafði tíu stiga forystu seint í þriðja fjórðungi áður en Skallagrímskonur spyrntu við fótum og minnkuðu muninn í fimm stig fyrir fjórða og síðasta leikhluta, 48-43. Nær komust þær hins vegar ekki því Keflavíkurliðið var einfaldlega sterkara í lokafjórðungnum og gaf aldrei færi á sér. Sjö stig skildu liðin að þegar fimm mínútur lifðu leiks en með góðum kafla á síðustu mínútunum náðu gestirnir að gulltryggja sigur sinn. Þegar lokaflautan gall munaði 13 stigum á liðunum, Keflavík vann með 68 stigum gegn 55.

Sigrún Sjöfn Ámundadóttir var atkvæðamest Skallagrímskvenna í leiknum. Hún skoraði 19 stig, reif niður 17 fráköst og gaf fimm stoðsendingar. Næst henni kom Tavelyn Tillman með 13 stig og fjögur fráköst en aðrar höfðu minna.

Skallagrímsliðið situr sem stendur í þriðja sæti deildarinnar með 14 stig eftir ellefu leiki, tveimur stigum á eftir Snæfelli í öðru sæti en með fjögurra stiga forskot á næstu lið fyrir neðan. Næsti leikur Skallagríms fer fram sunnudaginn 11. desember næstkomandi þegar liðið heimsækir Hauka.

Skallagrímskonur urðu að játa sig sigraðar á afmælisdaginn