Snæfell tók á móti Haukum í Domino‘s deild karla í körfuknattleik í gærkvöldi. Snæfell hefur átt erfitt uppdráttar í deildinni það sem af er vetri. Liðið var fyrir leikinn án sigurs á botni deildarinnar og það breyttist ekki í gær því Haukar sigruðu, 78-95.

Heimamenn höfðu heldur yfirhöndina í upphafi leiksins og leiddi fyrstu mínúturnar. Eftir það komust Haukar betur af stað, náðu forystunni og leiddu eftir fyrsta leikhluta, 19-24. Gestirnir þéttu varnarleik sinn í öðrum fjórðungi og hertu tök sín á leiknum. Þeir náðu 15 stiga forskoti um miðjan leikhlutann og svo aftur í lok hans. Staðan í hálfleik var 37-52, Haukum í vil.

Gestirnir byrjuðu síðari hálfleikinn af krafti og náðu 23 stiga forskoti en eftir það datt botninn úr þeirra leik og þeir áttu erfitt uppdráttar þar til seint í leikhlutanum. Snæfellingar komu lítillega til baka en náðu ekki að gera sér mat úr erfiðu gengi Hauka, sem leiddu með 21 stigi fyrir lokafjórðunginn. Þar bættu Haukar enn við og höfðu um og yfir 30 stiga forskoti allt þar til á lokamínútunum að Snæfell minnkuðu muninn í 17 stig með snörpum kafla. Það hafði þó ekkert að segja um úrslit leiksins. Haukar unnu, 78-95.

Sefton Barrett var atkvæðamestur Snæfellsmanna með 17 stig og tólf fráköst. Snjólfur Björnsson skoraði 13 stig og tók sex fráköst og Árni Elmar Hrafnsson skoraði tólf stig.

Sherrod Wright, sem lék með Snæfelli á síðasta tímabili, náði sér vel á strik með Haukum á sínum gamla heimavelli. Hann skoraði 33 stig, tók ellefu fráköst og gaf sjö stoðsendingar.

Snæfell er sem fyrr segir enn stigalaust á botni deildarinnar eftir níu leiki og sex stig eru í næstu lið fyrir ofan. Næst leikur Snæfell fimmtudaginn 8. desember næstkomandi, þegar liðið heimsækir Íslandsmeistara KR.

Snæfell varð að lúta í gras gegn Haukum