Skallagrímur mætti Tindastóli í Domino‘s deild karla í körfuknattleik í gærkvöldi. Leikið var norður á Sauðárkróki. Stólarnir voru í miklu stuði á Króknum, voru betri allan leikinn og unnu að lokum öruggan sigur, 97-75.

Heimamenn byrjuðu af krafti og voru komnir í 12-0 áður en tvær mínútur voru liðnar af leiknum. Skallagrímsmenn tóku leikhlé og fóru yfir sín mál og skoruðu næstu sex stigi leiksins en Stólarnir höfðu yfirhöndina og tóku að síga lengra fram úr á nýjan leik eftir því sem leið á upphafsfjórðunginn. Að honum loknum höfðu þeir skorað 33 stig gegn aðeins 16 stigum Skallagríms. Heimamenn héldu síðan um það bil því forskoti allt til hálfleiks og leiddu með 52 stigum gegn 36 í hléinu.

Skallagrímsmenn byrjuðu síðari hálfleikinn prýðilega, skoruðu fyrstu sex stigin og minnkuðu muninn í tíu stig. En eftir það tóku heimamenn við sér, áttu stórgóðan leikkafla og skoruðu 17 stig gegn fjórum og voru komnir með 21 stigs forskot um miðjan þriðja leikhluta. Skallagrímsmenn náðu ekki að svara fyrir sig og enn bættu Stólarnir við. Fyrir lokafjórðunginn munaði 28 stigum á liðunum og úrslit leiksins ráðin. Tindastóll bætti enn við, náði mest 33 stiga forskoti snemma í fjórða leikhluta en eftir það gáfu þeir eftir og Skallagrímsmenn náðu að kroppa aðeins af forystu heimamanna. Þegar leiknum lauk munaði 22 stigum á liðunum. Tindastóll vann, 97-75.

Flenard Whitfield var eini leikmaður Skallagríms sem náði sér á strik í leiknum. Hann skoraði 32 stig, tók 17 fráköst. Aðrir komust ekki í tveggja stiga tölu í stigaskorinu og það kann ekki góðri lukku að stýra.

Skallagrímur situr í níunda sæti deildarinnar með átta stig eftir níu leiki, jafn mörg stig og næstu þrjú lið fyrir ofan og tveimur stigum betur en næstu tvö fyrir neðan. Næsti leikur Skallagríms fer fram föstudaginn 9. desember næstkomandi þegar liðið heimsækir Þór í Þorlákshöfn.

Skallagrímsmenn mættu ofjörlum sínum á Sauðárkróki