Skallagrímskonur gerðu góða ferð suður með sjó í gærkvöldi og sóttu tvö stig til Grindavíkur þegar keppni hófst að nýju í Domino‘s deild kvenna eftir landsleikjahlé. Eftir erfiða byrjun komst Skallagrímsliðið betur og betur inn í leikinn eftir því sem leið á og hafði að lokum sigur, 61-72.

Skallagrímur var lengi í gang í leiknum í gær. Liðið átti erfitt uppdráttar í fyrsta leikhluta og skoraði aðeins sjö stig. Grindavíkurkonum gekk ekki mikið betur framan af en þær fundu aðeins taktinn undir lok upphafsfjórðungsins og leiddu 15-7 þegar hann var úti. Skallagrímskonur náðu að minnka muninn í fjögur stig í upphafi annars fjórðungs en eftir það náði Grindavíkurliðið góðum leikkafla og mest ellefu stiga forskoti. Borgarnesliðið átti hins vegar lokaorðið í fyrri hálfleik og gekk úr skugga um að heimaliðið hefði ekki nema sex stiga forskot í hléinu, 33-27.

Leikmenn Skallagríms mættu ákveðnir til leiks í síðari hálfleik og jöfnuðu eftir þrjár mínútur í þriðja fjórðungi. Leikurinn var í járnum eftir það en undir lok fjórðungsins komust Skallagrímskonur yfir og hafði þriggja stiga forystu fyrir lokaleikhlutann. Þær höfðu yfirhöndina í upphafi hans en Grindavíkurliðið var hvergi af baki dottið og jafnaði í 58-58 þegar fimm mínútur lifðu leiks. Þá sögðu Skallagrímskonur þetta gott af jafnræði liðanna, skoruðu næstu átta stig leiksins og lögðu grunn að góðum sigri á lokamínútunum. Þegar flautað var til leiksloka munaði ellefu stigum á liðunum. Skallagrímur sigraði, 61-72.

Tavelyn Tillman dró vagninn í liði Skallagríms með 29 stig og ellefu fráköst. Jóhanna Björk Sveinsdóttir skoraði 12 stig og tók sjö fráköst og Sigrún Ámundadóttir var með níu stig og tólf fráköst.

Skallagrímur situr í þriðja sæti Domino‘s deildar kvenna með 14 stig eftir tíu leiki, jafn mörg stig og Snæfell í sætinu fyrir ofan en fjórum stigum á undan Njarðvík í sætinu fyrir neðan.

Næsti leikur liðsins fer fram í Borgarnesi á laugardaginn, 3. desember, þegar Skallagrímur tekur á móti toppliði Keflavíkur.

Góður sigur Skallagríms þrátt fyrir erfiða byrjun