Í gærkvöldi hófst keppni í Domino‘s deild kvenna í körfuknattleik að nýju eftir landsleikjahlé þegar leikin var heil umferð. Snæfell mætti Val í Stykkishólmi og urðu Íslandsmeistararnir að játa sig sigraða á heimavelli eftir framlengdan leik, 73-82. Er þetta fyrsta tap Snæfells á heimavelli svo árum skiptir, slíkt vígi hefur íþróttahúsið í Stykkishólmi verið.

Valur hafði heldur yfirhöndina í upphafi leiks en Snæfell var aldrei langt undan. Gestirnir komust mest sex stigum yfir áður en Snæfell minnkaði muninn í eitt stig seint í upphafsfjórðungnum. Valskonur áttu hins vegar síðustu körfu leikhlutans og leiddu með þremur stigum að honum loknum, 20-23. Valskonur voru fastar fyrir í vörninni en varnarleikur Snæfells var langt frá því sem þær eru þekktar fyrir. Þar að auki fundu þær ekki fjölina sína í sókninni og hittu illa. Valur náði því smá forskoti í öðrum fjórðungi og leiddi með sex stigum í hálfleik, 36-42.

Snæfellskonur mættu mjög ákveðnar til síðari hálfleiks, skoruðu fyrstu ellefu stigin og komust yfir í fyrsta sinn í leiknum áður en gestirnir settu fyrstu körfuna sína eftir hléið. Jafnt var á með liðunum um miðbik þriðja fjórðungs en Snæfellskonur luku leikhlutanum af krafti og virtust vera að snúa taflinu sér í vil. Þær leiddu með fimm stigum fyrir lokafjórðunginn, 56-51. Síðustu tíu mínúturnar voru æsispennandi. Valskonur komu til baka og höfðu minnkað muninn í eitt stig áður en fjórði leikhluti var hálfnaður. Þær komust síðan yfir skömmu síðar og höfðu nauma forystu næstu mínúturnar. Snæfellskonur voru hins vegar ekki tilbúnar að leggja árar í bát og jöfnuðu þegar lítið var eftir af leiknum, 66-66. Það urðu lokatölur venjulegs leiktíma og því varð að bæta við.

Í framlengingunni reyndust Valskonur sterkari og náðu yfirhöndinni strax í upphafi viðbótartímans. Þær hittu vel úr skotum sínum utan af velli og nýttu allar ferðir á vítalínuna til hins ýtrasta. Snæfellsliðið náði sér ekki jafn vel á strik og varð að lokum að sætta sig við níu stiga tap, 73-82 og fyrsta tapið á heimavelli svo árum skiptir.

Urðu að láta toppsætið af hendi

Aaryn Ellenberg-Wiley var atkvæðamest Snæfellskvenna með 33 stig, níu stolna bolta, sjö fráköst og fjórar stoðsendingar. Berglind Gunnarsdóttir skoraði 13 stig og tók sex fráköst,

Bryndís Guðmundsdóttir skoraði 13 stig einnig og tók fjögur fráköst og Gunnhildur Gunnarsdóttir var með ellefu stig, fjögur fráköst og fjórar stoðsendingar.

Meðal leikmanna Valskvenna bar hæst að Mia Loyd setti frákastamet á leiktíðinni. Hún reif niður hvorki fleiri né færri en 25 fráköst og hefur enginn leikmaður gert betur það sem af er vetri í deildinni.

Úrslit leiksins gerðu það að verkum að Snæfell varð að láta toppsæti deildarinnar af hendi því Keflavík sigraði Hauka afgerandi í gær og tyllti sér þar með á toppinn. Snæfell hefur 14 stig í öðru sæti eftir fyrstu tíu leikina, jafn mörg stig og Skallagrímur í sætinu fyrir neðan, en tveimur stigum á eftir toppliði Keflavíkur.

Næsti leikur Snæfells fer fram næstkomandi laugardag, 3. desember og er einnig heimaleikur. Liðið fær Hauka í heimsókn í Hólminn.

Fyrsta tap Snæfells í Hólminum svo árum skiptir