Skessuhorn gengst nú tólfta árið í röð fyrir samkeppni meðal grunnskólabarna á Vesturlandi í gerð jólamynda. Líkt og undanfarin ár verður keppnin í þremur flokkum, en breytt í hópi elstu nemenda grunnskóla. Í fyrsta lagi býðst öllum börnum á aldrinum 6-9 ára (1. – 4. bekkur) að senda inn teiknaðar og litaðar myndir (A4) þar sem þemað á að vera jólin. Í öðru lagi býðst krökkum á aldrinum 10-12 ára (5.-7. bekkur) að senda inn myndir og er þemað það sama. Teikningakeppninni er því tvískipt eftir aldri.

Loks býðst elstu grunnskólakrökkunum, á aldrinum 13-16 ára (8.-10. bekkur) að senda inn ljósmyndir. Er það nýjung frá því sem verið hefur en áður hefur þessum aldurshópi staðið til boða að keppa í gerð jólasagna. Þemað í ljósmyndakeppninni er „aðventan“ og mega þátttakendur hafa alveg frjálsar hendur hvað varðar myndefni, vinnslu myndanna og svo framvegis. Hver þátttakandi má senda inn eins margar myndir og honum sýnist og engu skiptir hvort myndin er tekin á myndavél eða síma. Ljósmyndunum er hægt að skila inn í gegnum Instagram undir myllumerkinu #skessujól fyrir 15. desember nk. Einnig er hægt, fyrir þá sem ekki eru á Instagram, að senda þær með tölvupósti á netfangið: skessuhorn@skessuhorn.is. Með þeim myndum sem sendar eru í tölvupósti þurfa að koma fram upplýsingar um nafn ljósmyndara, aldur, símanúmer, heimili og skóla.

Vegleg verðlaun í boði

Valin verður besta myndin í hvorum flokki teikninga og besta ljósmyndin að mati dómnefndar. Sigurvegari í Instagram keppninni fær GoPro myndavél að launum en sigurvegarar í teiknimyndasamkeppni fá stafræna myndavél í verðlaun. Að auki verða bókaverðlaun fyrir 2.-3. sæti í hverjum flokki. Verða úrslit og verðlaunamyndir birt í Jólablaði Skessuhorns sem kemur út miðvikudaginn 21. desember nk.

Skilafrestur á myndum í samkeppnina er til og með hádegis fimmtudaginn 15. desember, en athugið að póstleggja þarf teikningar fyrr. Myndir skulu sendar í pósti á heimilisfangið: Skessuhorn ehf., Kirkjubraut 56, 300 Akranes. Athugið að myndirnar þurfa að hafa borist á hádegi 15. desember! Munið að merkja vel myndirnar á bakhlið þeirra (nafn, aldur, símanúmer, heimili og skóli).

Skessuhorn hvetur alla krakka á grunnskólaaldri á Vesturlandi til að taka þátt í þessum skemmtilega leik og senda okkur jóla- og aðventumyndir.

Jólasamkeppni Skessuhorns meðal grunnskólanema