Veitur, dótturfyrirtæki Orkuveitu Reykjavíkur, hafa á þessu árið unnið við fráveitu í Borgarnesi og á Akranesi. Að sögn Írisar Þórarinsdóttur tæknistjóra fráveitu Veitna er verkefnið örlítið á eftir áætlun en ráðgert að ný fráveita verði tekin í notkun innan tíðar.

Í sumar og haust var unnið að lagningu sjólagna í Borgarnesi. Að sögn Írisar var unnið við erfiðar aðstæður á Borgarfirði en mikill straumur er út fjörðinn. Búið er að koma lögnum á réttan stað en hæðarlega þeirra er ekki ennþá samkvæmt hönnun fráveitunnar. „Byrjað var að dæla sandi undan lögnunum til að koma þeim í rétta hæð en vegna óhagstæðra veðuraðstæðna í haust tókst ekki að ljúka því verki. Dælingu undan lögnum hefur því verið frestað til vorsins 2017. Það er þó hægt að setja dælustöðvarnar í gang þó sjólagnirnar séu ekki alveg í réttri hæð, svo þetta verk mun ekki tefja gangsetningu stöðvarinnar í Borgarnesi,“ segir Íris.

Í ár hefur einnig verið unnið við lagnavinnu og smíði dælubrunns við Krókalón á Akranesi. Lagnavinnan er langt komin og smíði dælubrunnsins einnig, en framkvæmdir hafa þó dregist lengra fram á vetur en upphaflega var gert ráð fyrir. Framkvæmdir við Krókalón klárast fyrir áramót.

„Samhliða þessum framkvæmdum hefur verið unnið að uppsetningu vél- og rafbúnaðar í hreinsi- og dælustöðvum á Akranesi og Borgarnesi. Uppsetning á búnaði er langt komin og hefjast prófanir í lok árs. Þegar prófunum á öllum kerfum lýkur er hægt að setja hreinsistöðvarnar í gang. Verið er að setja upp flókin kerfi, þar sem dælur og hreinsibúnaður þurfa að ganga í takt, og mikilvægt er að ganga úr skugga um að allt virki og allar stillingar séu réttar áður en skólpi verður hleypt á stöðvarnar. Eins er verið að setja upp nýtt stýrikerfi og tengja það við stjórnstöð Veitna í Reykjavík, svo hægt verði að vakta kerfið frá stjórnstöð og frá starfsstöðvum Veitna í Borgarnesi og á Akranesi.“

: Hér er verið að draga fráveitulögn út á Borgarfjörð. LJósm. Þorleifur Geirsson.

Styttist í að ný fráveitumannvirki verði tekin í notkun