Út er komin ný rafbók eftir Braga Þórðarson rithöfund og útgefanda á Akranesi og nefnist hún Sagnasprek úr Borgarfirði – Sögur og sagnir. Þetta er 21. bók höfundar um fólk og mannlíf á Akranesi og í Borgarfirði. Bókaútgáfan emma.is er útgefandi bókarinnar. Bókin er eingöngu fáanleg sem rafbók og seld á á netinu á Amazon.com, eins og aðrar bækur Braga, sem allar eru uppseldar í venjulegum útgáfum á prenti og hljóðdiskum. Hljóðbækur Braga eru aftur fáanlegar hjá eBaekur.is.

Efniskaflar þessarar nýju bókar heita:

Ekkjan sem endurheimti börnin sín

Kraftakonan Kristín Pálsdóttir

Af Þórði bónda í Haga

Skorradalsvatn – þjóðsögur

Hraustir Borgfirðingar

Meiðyrðamál vegna líkræðu

Draumar og reimleikar

Kerlingabækur

Úr ýmsum áttum.

„Í þessu bókarkorni eru ýmsir þættir sem ég hef skrifað á undanförnum árum samhliða öðrum bókaskrifum. Fæstir þeirra hafa birst áður,“ segir Bragi í samtali við Skessuhorn. En fræðumst nánar um einstaka efniskafla nýju rafbókarinnar. Bragi hefur orðið:

„Fyrsti þátturinn, um ömmu mína Kristbjörgu Þórðardóttur og afa minn Ásmund Þorláksson, birtist að hluta til í bók minni „Æðrulaus mættu þau örlögum sínum“ – 1996. Nú hef ég endurskráð þáttinn og bætt við nánari upplýsingum, sem ég fékk eftir útkomu þeirrar bókar frá föðursystkinum mínum. Stuðst er við frásagnir systkinanna og samtímaheimildir.

Kraftakonan Kristín Pálsdóttir var forkur dugleg, mikil ferðakona og vílaði ekki fyrir sér vosbúð og slark. Ólíkt öðrum konum notaði hún tóbak og þótti brennivín býsna gott. Af hreysti hennar eru sagðar ótrúlegar sögur, nokkrar þeirra eru skráðar hér.

Þórði í Haga kynntist ég persónulega árið 1962 þegar fjölskylda okkar Elínar setti upp sumarbústað í landi hans. Í þættinum rifja ég upp þau góðu kynni og aðrar frásagnir sem lýsa kjarki hans og þrautseigju. Margir hafa spurt: Hver var Þórður í Haga? Er hann raunverulegur bóndi, eða persónugervingur íslenska bóndans frá liðinni tíð? Þeirri spurningu verður ekki svarað hér, en þeir sem kynntust honum gleyma aldrei bóndanum veðurbarða, sem hélt sínu striki í meira en 100 ár.

Í næsta kafla á eftir eru þjóðsögur um Skorradalsvatn.

Hraustir Borgfirðingar. Í þættinum er sagt frá séra Snorra á Húsafelli og Kvíahellunni frægu. En aðalefni þáttarins er um Vigfús sterka Auðunsson á Kvígsstöðum í Andakíl sem var hálfgerð þjóðsagnapersóna vegna krafta sinna.

Meiðyrðamál vegna líkræðu er þáttur um Eyjólf Magnússon ljóstoll. Hann lærði bókband í Reykjavík, en mun einnig hafa verið við bóklegt nám um skeið. Stundaði aðallega barnakennslu í Borgarfirði, Stafholtstungum, Hvítársíðu og Reykholtsdal. Á námsárum sínum í Reykjavík innheimti Eyjólfur ljóstolla og fleiri gjöld og fékk hann þá auknefnið ljóstollur. Eyjólfur var vínhneigður og laus í rásinni. Í þessum þætti hef ég safnað flestu því sem ég hef heyrt frá honum sagt og lesið um hann.

Aðrir þættir í bókinni eru: Draumar og reimleikar og Kerlingabækur og sagnir úr ýmsum áttum. Báðir byggja þeir þættir á munnlegum eða skriflegum frásögnum sem skýra sig sjálfar,“ segir Bragi.