Sundfólk úr Sundfélagi Akraness gerði gott mót á Íslandsmeistaramótinu í 25 metra laug sem fram fór um helgina. Alls kepptu níu sundmenn frá félaginu á mótinu og sneru þrír þeirra heim með verðlaunapeninga.

Ágúst Júlíusson varð Íslandsmeistari í bæði 50 og 100 metra flugsundi. Hann setti nýtt Akranesmet og var undir lágmarkinu sem þarf til að öðlast þátttökurétt á Norðurlandamótinu sem fram fer í Danmörku 8.-12. desember næstkomandi. Þá vann hann silfurverðlaun í 50 m skriðsundi, einnig á nýju Akranesmeti og undir NM lágmarkinu.

Sævar Berg Sigurðsson hreppti silfurverðlaun í 200 m bringusundi og var aðeins 0,02 sekúndum á eftir sigurvegaranum. Þá vann hann til bronsverðlauna í 100 m bringusundi.

Brynhildur Traustadóttir átti mjög góða helgi. Hún bætti sinn besta árangur í 400 m skriðsundi um heilar 14 sekúndur og vann til bronsverðlauna.

Þá féllu einnig á mótinu tvö Akranesmet í boðsundi; í 4×100 m fjórsundi blandaðra sveita og í 4×100 m skriðsundi blandaðra sveita.

„Allir okkar 9 sundmenn sem voru á mótinu áttu margar góðar bætingar, þau héldu stolt uppi merki ÍA og voru okkur öllum til sóma á bakkanum,“ segir í tilkynningu frá sundfélaginu. Ítarlegri úrslit má sjá á www.ia.is.

: Verðlaunahafar Sundfélags Akraness á Íslandsmeistaramótinu í 25 m laug. F.v. Sævar Berg Sigurðsson, Brynhildur Traustadóttir og Ágúst Júlíusson.

Ágúst Júlíusson varð tvöfaldur Íslandsmeistari um helgina