Mikill eldur er í byggingum fiskþurrkunarinnar á Miðhrauni í Eyja- og Miklaholtshreppi á Snæfellsnesi. Allt tiltækt slökkvilið frá Snæfellsnesi, Borgarbyggð og Akranesi var kallað út klukkan 4:50 í nótt. Það var flutningabílstjóri á leið um Snæfellsnesveg sem varð fyrstur var við eldinn og gerði Neyðarlínunni viðvart. Auk búnaðar slökkviliðanna af svæðinu hefur verið sendur af stað búnaður frá Brunavörnum Suðurnesja til að auðvelda slökkviliðsmönnum baráttuna. Viðbúnaður er mikill enda hætt við að eldurinn nái í nærliggjandi byggingar. Að sögn Bjarna Kr Þorsteinssonar slökkviliðsstjóra í Borgarnesi er ljóst að það mun taka slökkviliðsmenn nokkurn tíma að ráða niðurlögum eldsins enda eldsmatur mikill og byggingar stórar og flóknar. Ljóst er því að hér er um einn stærsta eldsvoða að ræða á Vesturlandi í seinni tíð.

Á Miðhrauni hefur verið starfrækt fiskþurrkun, einkum hausaþurrkun, í tæpa tvo áratugi og hefur fyrirtækið verið langstærsti vinnuveitandinn í Eyja- og Miklaholtshreppi um margra ára skeið.

Eldur Miðhrauni_1 Eldur Miðhrauni_3 Eldur Miðhrauni_4

Eldur Miðhrauni_5 Eldur Miðhrauni_6

Eldur Miðhrauni_7

Eldur Miðhrauni_8

Gríðarmikill eldur í fiskþurrkuninni á Miðhrauni