Skagamenn tóku á móti Fjölni í 1. deild karla í körfuknattleik í gær. Var þetta önnur viðureign liðanna á stuttum tíma, en Fjölnismenn slógu ÍA með nokkuð sannfærandi hætti út úr bikarkeppninni á dögunum. Annað var uppi á teningnum í gær og heldur meiri spenna í leiknum og sérstaklega í síðari hálfleik. Fór að lokum svo að Fjölnir hafði eins nauman sigur og mögulegt er, 71-72.

Gestirnir byrjuðu mun betur og virtust í upphafi hreinlega ætla að valta yfir ÍA liðið. Þeir komust í 10-0 snemma leiks en þá tóku Skagamenn við sér, söxuðu á forskotið og komust yfir með síðustu stigum upphafsfjórðungsins, 22-21. Mikið jafnræði var með liðunum framan af öðrum leikhluta. Skagamenn leiddu með einu til þremur stigum en Fjölnismenn fylgdu þeim eins og skugginn. Er tók að líða nær hálfleiknum náðu heimamenn hins vegar betri tökum á leiknum og sigu lengra og lengra fram úr gestunum. Góðar körfur undir lok hálfleiksins skiluðu þeim tólf stiga forskoti í hléinu, 42-30 og vænlegri stöðu fyrir síðari hálfleikinn.

Gestirnir komu ákveðnir til leiks eftir hléið og tóku að kroppa stig og stig af forskoti Skagamanna. Þegar þrjár mínútur voru eftir af þriðja leikhluta komst Fjölnir stigi yfir. Þá tók ÍA forskotið aftur með tveimur góðum körfum en Fjölnir jafnaði og komst yfir á ný. Höfðu gestirnir tveggja stiga forystu fyrir lokafjórðunginn 57-59. Þar voru Fjölnismenn sterkari. Þeir leiddu með nokkrum stigum lungann úr leikhlutanum og héldu Skagamönnum frá sér. Það var ekki fyrr en á lokamínútunum að Skagamenn náðu að gera verulega atlögu að forystunni og voru aðeins hársbreidd frá því að jafna, því þeir misnotuðu vítaskot þegar aðeins fjórar sekúndur lifðu leiks. Þar með sluppu Fjölnismenn með skrekkinn og höfðu eins stig sigur, 71-72.

Derek Shouse var atkvæðamestur Skagamanna með 23 stig og sex fráköst. Jón Orri Kristjánsson var með 14 stig, sjö fráköst og fimm stoðsendingar og Björn Steinar Brynjólfsson skoraði tólf stig, tók fimm fráköst og gaf fjórar stoðsendingar.

Úrslit leiksins þýða að Skagamenn sitja enn í áttunda og næstneðsta sæti deildarinnar með tvö stig eftir átta leiki. Næst leika þeir á sunnudaginn kemur, 20. nóvember, þegar þeir taka á móti liði FSu.

Grátlegt eins stigs tap Skagamanna