Fimmtudaginn 17. nóvember kl. 19.30 verða tónleikar í Tónbergi, sal Tónlistarskólans á Akranesi. Bera þeir yfirskriftina Tékkland-Ísland. Þar verður stefnt saman tékkneskri og íslenskri tónlist og tónlistarflytjendum. PiKap strengjakvartettinn frá Tékklandi leikur strengjakvartett eftir Hildigunni Rúnarsdóttur ásamt kvartettum eftir Smetana, Sylvie Bodorová og Jaroslav Krček og fær svo til liðs við sig Eydísi Franzdóttur ástaróbóleikara til flutnings á Divertimento d’Amore eftir tékkneska ungtónskáldið Daniel Pitra.

„Það er ekki á hverjum degi sem býðst að hlýða á strengjakvartetta utan úr heimi og er þetta því bæði hvalreki fyrir unnendur klassískrar tóinlistar og nemendur Tónlistarskólans á Akranesi sem munu njóta þess að hitta í návígi strengjaleikara í fremstu röð,“ segir Guðmundur Óli Gunnarsson skólastjóri.

PiKap strengjakvartettinn kemur frá vestur Tékklandi; frá Pilzen og Karlovy Vary (Karlsbad). Kvartettinn hefur komið víða fram, s.s. á tónlistarhátíðum í Frakklandi, Englandi, Þýskalandi, Ítalíu, Króatíu og Tékklandi, en einnig á Íslandi. Þau léku á tónleikum Tónlistarfélags Akureyrar í Ketilhúsinu og á Tíbrártónleikum í Salnum í Kópavogi árið 2004, við mjög góðar undirtektir og er því tilhlökkunarefni að heyra í hópnum, nú á Akranesi. Meðlimir kvartettsins eru virkir í tónlistarlífinu í Tékklandi þar sem þau spila í Sinfóníuhljómsveitinni í Karlovy Vary og Óperuhljómsveitinni í Pilzen auk þess að vera virk í kammertónlist, stunda kennslu og hafa leikið þjóðlagatónlist frá blautu barnsbeini.

Hildigunnur Rúnarsdóttir samdi strengjakvartettinn nr. 1 fyrir PiKap strengjakvartettinn 2011-2012 og frumfluttu þau verkið í Tékklandi árið 2012. Verkið heyrist nú í fyrsta sinn á Íslandi í upprunalegri mynd. Strengjakvartett nr. 2 eftir hið kunna tékkneska tónskáld Bedrich Smetana verður einnig á dagskrá og er virkilega gaman að heyra tékkneska flytjendur leika tónlist hans eins og þeim er í blóð borið, af hita og blóðheitri tilfinningu. Við fáum einnig að heyra nýrri strengjakvartetta: Strengjakvartett nr. 4 eftir Sylvie Bodorovu (1954) sem stundaði m.a. nám hjá Donatoni á Ítalíu og Ton de Leeuw í Amsterdam eins og sum okkar fremstu tónskálda og einnig glænýjan strengjakvartett eftir Jaroslav Krček sem er best þekktur sem sjórnandi hinnar kunnu kammersveitar Musica Bohemica í Prag. Sá kvartett er saminn sérstaklega fyrir PiKap og var frumfluttur í Norræna húsinu s.l. sunnudag. Síðast en ekki síst er á efnisskrá Divertimento d’Amore eftir Daniel Pitra, 22 ára tékkneskt tónskáld sem hefur m.a. stundað nám við Konservatoríið í Prag. Verkið var samið fyrir Eydísi, ástaróbóið og Pikap strengjakvartettinn 2012 og flutt það ár bæði í Tékklandi og á tónlistarhátíðinni Zeit für Neue Musik – í Bayreuth í Þýskalandi.

Miðaverð er 2000, frítt fyrir nemendur Tónlistarskólans á Akranesi.

-fréttatilkynning

Strengjakvertettinn PiKap heldur tónleika í Tónbergi