Íslandsmeistarar Snæfells mættu liði Njarðvíkur í Domino‘s deild kvenna á laugardag. Leikið var suður með sjó og höfðu Snæfellskonur stórsigur, 38-69.

Mikilvæga leikmenn vantaði í bæði lið. Njarðvíkingar voru án Carmen Tyson-Thomas og fyrirliði Snæfells, Gunnhildur Gunnarsdóttir, gat ekki leikið með sínu liði vegna höfuðhöggs sem hún varð fyrir í leiknum gegn Skallagrími. Hins vegar reimaði Alda Leif Jónsdóttir á sig körfuknattleiksskóna og klæddist Snæfellstreyjunni í fyrsta sinn í vetur.

Njarðvíkurliðið byrjaði mun betur í leiknum en Snæfellskonur voru heillum horfnar á upphafsmínútum leiksins. Um miðjan fyrsta leikhluta höfðu þær ekki skorað stig og heimakonur leiddu 11-0. Þá tóku Snæfellskonur við sér og jöfnuðu metin með góðum kafla en Njarðvíkurliðið átti lokaorðið í upphafsfjórðungnum og leiddi með þremur stigum að honum loknum, 16-13. Eftir það var mjög jafnt á með liðunum, allt þar til líða tók að hálfleik. Þá fundu Snæfellskonur taktinn, komust yfir og stungu af. Þær skoruðu átta stig á lokamínútu fyrri hálfleiks, leiddu 34-21 í hléinu og voru komnar í ákjósanlega stöðu.

Snæfell réði síðan lögum og lofum allan síðari hálfleikinn á meðan Njarðvíkurliði komst hvorki lönd né strönd. Heimakonur skoruðu aðeins 17 stig allan síðari hálfleikinn en annað var uppi á teningnum hjá Snæfellskonum. Seint í þriðja fjórðungi höfðu þær skorað tvöfalt fleiri stig en heimaliðið í stöðunni 27-54 og úrslit leiksins löngu ráðin. Þær bættu lítillega við forskot sitt það sem eftir lifði leiks og unnu að lokum 31 stigs sigur, 69-38.

Aaryn Ellenberg var atkvæðamest í liði Snæfells og var hársbreidd frá því að setja upp þrennu. Hún skoraði 20 stig, tók tólf fráköst og gaf níu stoðsendingar. Berglind Gunnarsdóttir skoraði 12 stig og Pálína Gunnlaugsdóttir var með níu stig og átta fráköst en aðrar höfðu minna.

Snæfell er á toppi deildarinnar með 14 stig eftir níu leiki, jafn mörg stig og Keflavík í sætinu fyrir neðan. Framundan er landsleikjahlé í Domino‘s deild kvenna á meðan landslið Íslands mætir Slóvakíu og Portúgal í undankeppni Evrópumótsins dagana 19. og 23. nóvember næstkomandi. Næsti leika Snæfellskonur því miðvikudaginn 30. nóvember þegar þær taka á móti Val í Stykkishólmi.

Snæfell valtaði yfir Njarðvík