Skallagrímskonur hafa farið vel af stað í Domino‘s deild kvenna í körfuknattleik í vetur og oft leikið afar vel, ekki síst á heimavelli. Fjósið er að verða mikið heimavígi og fengu leikmenn Stjörnunnar að kynnast því þegar liðin mættust í Borgarnesi á laugardaginn. Skallagrímur hafði yfirhöndina nær allan leikinn og vann að lokum góðan sigur, 75-63. Er liðið ósigrað í fimm leikjum á heimavelli í vetur.

Það var ekki nema rétt fyrstu tvær mínúturnar sem jafnræði var með liðunum. Eftir það náðu Skallagrímskonur forystunni og litu aldrei til baka. Þær voru mun betri í upphafsfjórðungnum og leiddu með tíu stigum að honum loknum, 25-15. Áfram réðu þær gangi mála inni á vellinum í öðrum leikhluta, héldu Stjörnunni í öruggri fjarlægð og náðu mest 16 stiga forskoti. Stjarnan náði að klóra í bakkann og minnka muninn í átta stig en Skallagrímskonur kláruðu fyrri hálfleikinn af krafti og leiddu með tólf stigum í hléinu, 46-34.

Það sama var uppi á teningnum í síðari hálfleik og í þeim fyrri. Skallagrímur hafði yfirhöndina og stjórnaði gangi leiksins. Stjörnustúlkur fengu það hlutskipti að elta og það gerðu þær en ekkert meira en það. Aldrei komust þær nærri Skallagrímsliðinu en í tíu stiga fjarlægð í upphafi síðari hálfleiks. Það sem eftir lifði leiks munaði allt að 19 stigum á liðunum og að lokum sigldu Skallagrímskonur öruggum sigri heim, 75-63.

Tavelyn Tillman átti stórleik fyrir Skallagrím. Hún skoraði 35 stig, tók átta fráköst og gaf fimm stoðsendingar. Ragnheiður Benónísdóttir var með átta stig og níu fráköst og Sigrún Ámundadóttir með átta stig og fráköst.

Skallagrímsliðið situr í þriðja sæti deildarinnar með tólf stig eftir níu leiki, tveimur stigum á eftir Keflavík og Snæfelli. Framundan er landsleikjahlé í Domino‘s deild kvenna á meðan landslið Íslands mætir Slóvakíu og Portúgal í undankeppni Evrópumótsins dagana 19. og 23. nóvember næstkomandi. Skallagrímur leikur því næsta leik sinn miðvikudaginn 30. nóvember þegar liðið mætir Grindavík suður með sjó.

Skallagrímskonur ósigraðar á heimavelli