Keppni í Maltbikarnum, bikarkeppni KKÍ, hófst um liðna helgi. Vestlendingar eiga sína fulltrúa í bikarkeppninni, en sex lið úr landshlutanum taka þátt að þessu sinni.

Ríkjandi bikarmeistarar Snæfells hófu titilvörn sína þegar þeir mættu Val í æsispennandi leik í Stykkishólmi í gær. Jafnt var á öllum tölum meira og minna frá fyrstu mínútu og úrslitin réðust ekki fyrr en á lokamínútunum. Þar reyndust Snæfellskonur heldur sterkari og höfðu að endingu þriggja stiga sigur 79-76 og eru komnar áfram í næstu umferð í bikarkeppni kvenna.

Töp í karlaleikjum helgarinnar

Jón Orri Kristjánsson og félagar hans í ÍA máttu sætta sig við tap gegn Fjölni í gær. Ljósm. jho.

ÍÁ tapaði fyrir Fjölni. Ljósm. jho.

Grundfirðingar tóku á laugardag á móti liði 1. deildar liði FSu í bikarkeppni karla og töpuðu með 13 stiga mun, 56-69. Eftir mjög jafnan fyrsta leikhluta sigur gestirnir fram úr um miðjan annan fjórðung og létu forystuna aldrei af hendi og sigruðu. Grundfirðingar mega þó vel við una því Selfossliðið spilar tveimur deildum ofar en þeir og voru í úrvalsdeildinni á síðasta ári.

ÍA fékk Fjölni í heimsókn á Akranes í gær og þar voru gestirnir hlutskarpari. Fjölnismenn voru sterkara lið vallarins allan leikinn og Skagamenn náðu aldrei að gera neina alvöru atlögu að forskoti þeirra. Að lokum vann Fjölnir með 23 stiga mun, 67-90.

Tvö lið leika í kvöld

Í kvöld, mánudaginn 7. nóvember, leggja bæði Skallagrímur og Snæfell land undir fót og leika í bikarkeppni karla. Skallagrímsmenn heimsækja Breiðablik og Snæfell sækir Val heim.

Skallagrímskonur sitja hjá í fyrstu umferð Maltbikars kvenna og leika því ekki fyrr en í annarri umferð.

Snæfellskonur unnu – ÍA og Grundfirðingar töpuðu