Skagamenn fengu Val í heimsókn í 1. deild karla í körfuknattleik í gær. Valur hafði fyrir leikinn þrjá sigra en ÍA einn eftir fyrstu fimm leiki vetrarins. Skagamenn voru án tveggja lykilmanna, Fannars Freys Helgasonar og Áskels Jónssonar, sem er rifbeinsbrotinn. Hafði það sitt að segja í leiknum í gær. Gestirnir voru mun einbeittari og betra lið vallarins lungann úr leiknum og unnu að lokum öruggan sigur, 76-103.

Valsmenn mættu einbeittir til leiks og byrjuðu af krafti en Skagamenn virtust annars hugar og voru gjarnir á að kasta boltanum frá sér. Valsmenn náðu því snemma nokkuð þægilegri forystu. Skagamenn tóku á sig rögg í öðrum leikhluta og allt annar bragur á leik liðsins. Þeir minnkuðu niður í fjögur stig snemma í öðrum leikhluta og gáfu gestunum ekkert eftir. Valsmenn náðu hins vegar góðum spretti undir lok leikhlutans og leiddu með tíu stigum í hálfleik, 46-36.

Í upphafi síðari hálfleiks tóku liðin upp þráðinn þaðan sem frá var horfið. Skagamenn minnkuðu muninn lítillega í tvígang en komust aldrei nær en í sjö stiga fjarlægð. Gestirnir náðu góðum kafla á seinni hluta þriðja fjórðungs, höfðu 16 stiga forskot fyrir fjórða leikhluta og róðurinn orðinn þungur fyrir Skagamenn. Þeir fundu taktinn aldrei nógu vel og tókst því ekki að gera neina alvöru atlögu að forskoti Valsmanna. Gestirnir sigldu æ lengra fram úr eftir því sem leið á lokafjórðunginn og unnu að lokum öruggan 27 stiga sigur, 76-103.

Derek Shouse var atkvæðamestur Skagamanna í leiknum með 35 stig og níu fráköst. Jón Orri Kristjánsson skoraði 15 stig og tók ellefu fráköst og þá var Björn Steinar Brynjólfsson með tíu stig og sex fráköst.

Skagamenn eru eftir leikinn í áttunda og næstneðsta sæti deildarinnar með tvö stig eftir sex leiki, jafnmörg stig og Vestri í sætinu fyrir ofan. Á botninum eru Ármenningar enn án stiga.

Næst leikur ÍA í deildinni gegn Breiðabliki á útivelli föstudaginn 11. nóvember næstkomandi. En í millitíðinni er bikarleikur gegn Fjölni. Hann fer fram á sunnudaginn, 6. nóvember, og verður leikinn í íþróttahúsinu við Vesturgötu á Akranesi.

Skagamenn fundu ekki taktinn í tapleik gegn Val