Síðastliðinn þriðjudag fóru fram tvennir tónleikar í Ungir – Gamlir í Bíóhöllinni á Akranesi. Verkefnið er árlegt samstarfsverkefni grunnskólanna í bæjarfélaginu og Tónlistarskóla Akraness. Fluttur var fjöldi söngatriða þar sem nemendur komu fram einir eða í misstórum hópum. Kynnir var Samúel Þorsteinsson tónlistarkennari, en um undirspil sá húsbandið sem að stórum hluta er skipað félögum í hinni geisivinsælu hljómsveit Tíbrá, en auk þess spiluðu nemendur tónlistarskólans og grunnskólanna undir. Sérstakur gestur í verkefninu Ungir – Gamli að þessu sinni var söngkonan Gréta Salóme. Kom hún bæði fram sem söngvari, eða í bakraddasöng auk þess að spila undir á fiðluna í mörgum atriðum. Gréta Salóme gat þess á tónleikunum að hún hefði sjaldan eða aldrei tekið þátt í skemmtilgra verkefni en þessu. Gaf hún nemendum og tónlistarfólkinu öllu mikið hrós fyrir frábæra frammistöðu. Var það vel mælt því tónleikarnir tókust afar vel og ljóst að mikið af hæfileikaríku ungu fólki er á Akranesi og framtíðin því björt í þeim efnum.

Ungir Gamlir í Bíóhöllinni