Finnski karlakórinn KYL er væntanlegur til Íslands nú í byrjun nóvembermánaðar og mun halda tvenna tónleika hér á landi. Aðrir þeirra verða í Vinaminni á Akranesi sunnudaginn 6. nóvember og bera yfirskriftina „Þetta er Finnland“. Þeir tónleikar eru ætlaðir sem kynning á ríkri hefð kórtónlistar í Finnlandi. Þar fá áheyrendur að heyra verk eftir helstu tón- og ljóðskáld Finna sem endurspegla náttúru Finnlands, einkennilegar persónur, depurð og tilfinningasemi.

Tónleikar KYL í Reykjavík bera heitið „Saga kvikmyndatónlistar“ og þar kveður við annan hljóm en á tónleikunum á Akranesi. Karlakórinn KYL mun þar syngja kvikmyndatónlist auk þess sem vídeólistamaðurinn Sellekhanks ljær tónleikaupplifuninni nýja vídd með hreyfimyndum og sjónrænni sköpun.

„Að koma til Íslands hefur lengi verið á dagskrá kórsins, enda eru á Íslandi starfræktir ótrúlega margir kórar sem sýnir að söngur er í hávegum hafður. Okkur langar að bjóða aðdáendum kórtónlistar upp á eitthvað óvænt og spennandi með tónleikum okkar á Íslandi,“ segir Jukka Kajan, talsmaður kórsins. „Við ætlum að hita upp fyrir tónleikana á Akranesi og í Reykjavík með því að koma fram á mjög afslöppuðum tónleikum á Airwaves off-venue. Það er skemmtilegt til þess að hugsa til þess að á aðeins örfáum dögum munum við syngja allt frá Britney Spears til Sibeliusar, þjóðskáldsins okkar,“ segir Jukka og hlær við.

Tónleikarnir „Þetta er Finnland“ hefjast kl. 20:00 að kvöldi sunnudagsins 6. nóvember og verða sem fyrr segir í safnaðarheimilinu Vinaminni á Akranesi. Aðgangseyrir er 2.000 krónur og miðar verða seldir við innganginn.

Áhugasömum um Reykjavíkurtónleika KYL er bent á að miðasala á þá tónleika fer fram á www.midi.is.

Finnski karlakórinn KYL heldur tónleika í Vinaminni