Undanfarin haust hefur Snorrastofa í Reykholti gefið út yfirlit þeirra viðburða sem hún stendur fyrir og nú hefur skrá komandi vetrar litið dagsins ljós og verið borin til heimila á Vesturlandi. Auk þess að tilgreina viðburðina kynnir stofnunin einnig bókaútgáfu og aðstöðu til fræðistarfa og listsköpunar, sem er eftirsótt og aðlaðandi.

Í skránni kennir margra grasa, „Fyrirlestrar í héraði“ eru einu sinni í mánuði, sem fjalla um menningar- og sögutengd málefni þjóðar og héraðs, námskeið um Borgfirðingasögur eftir áramótin, auk þess sem líflegt er í kringum Pjóna-bóka-kaffi bókhlöðunnar og æfingar Kvæðamannafélagsins „Snorra í Reykholti“. Þá má einnig geta Norrænu bókasafnavikunnar og Dags íslenskrar tungu í nóvember, sem Snorrastofa heldur á lofti með upplestri fyrir yngri og eldri, fyrirlestri, æfingu og fundi í kvæðamannafélaginu, prjóna-bóka-kaffi í bókhlöðunni og heimsókn rithöfundarins Iðunnar Steinsdóttur í Grunnskóla Borgarfjarðar, á fund eldri borgara í Brún og í prjóna-bóka-kaffið. Hápunktur viðburða ársins hlýtur þó að teljast Snorrahátíðin, sem haldin verður í Reykholti laugardaginn 15. júlí næstkomandi þar sem þess verður minnst að 70 ár verða þá liðin frá fyrstu Snorrahátíðinni 1947 þegar Norðmenn færðu Íslendingum styttu Vigelands af Snorra Sturlusyni.

Snorrastofa leitast við að laða sem flesta til samstarfs að viðburðum, sem snerta miðaldir og menningu í víðum skilningi, sögu Borgarfjarðar og samfélagsmálefni og viðburðaskráin er órækt vitni um að vel hefur til tekist. Til samstarfs í vetur og sumri komanda verða Framfarafélag Borgfirðinga, Landnámssetrið í Borgarnesi, Kvæðamannafélagi „Snorri í Reykholti“, Norræna félagið í Borgarfirði, Félag aldraðra í Borgarfjarðadölum, Símenntunarmiðstöðin á Vesturlandi, og Reykholtshátíð. Þá má einnig geta hlutdeildar Sögu jarðvangs að viðburðunum en slíkt starf skipar sess í burðarásum hans. Uppbyggingarsjóður Vesturlands styrkir viðburðina.

Snorrastofa þakkar velvilja og undirtektir samfélagsins og starfsfólk hlakkar til ánægjulegrar og gefandi samveru á komandi vetri.

-fréttatilkynning

Viðburðaskrá Snorrastofu komin út