Á miðvikudagskvöld fóru Snæfellskonur suður með sjó og öttu kappi við Grindavík í Domino‘s deild kvenna í körfuknattleik. Snæfell lék án Taylor Brown, sem er farin heim til Bandaríkjanna af persónulegum ástæðum og leikur ekki meir með liðinu. Leikurinn á miðvikudag var jafn og spennandi og þurfti að framlengja til að knýja fram sigurvegara. Að endingu var það Grindavík sem fór með þriggja stiga sigur af hólmi, 66-69.

Grindavík byrjaði leikinn af miklum krafti en Snæfellskonur náðu sér ekki á strik í upphafi og var 15 stigum á eftir þegar annar fjórðungur hófst. Þær voru hins vegar sterkara lið vallarins í öðrum leikhlutanum og minnkuðu forskotið niður í fimm stig, 30-25 þegar flautað var til hálfleiks.

Hólmarar komu sterkir til leiks eftir hléið og komust yfir um miðjan þriðja leikhluta. Grindavíkurliðið spyrnti við fótum og minnkaði muninn í eitt stig en Snæfell kláraði leikhlutann af krafti og leiddi með fjórum stigum, 38-42 fyrir lokafjórðunginn. Snæfell lék vel í fjórða leikhluta, náði snemma níu stiga forskoti og allt benti til þess að Íslandsmeistararnir ætluðu að sigla sigrinum heim. En þegar þrjár mínútur lifðu leiks náðu Grindvíkingar stórgóðum leikkafla og minnkuðu muninn í aðeins eitt stig. Upphófust þá æsispennandi lokamínútur þar sem Snæfell leiddi með einu stigi en Grindvíkingar fylgdu þeim eins og skugginn. Bryndís Guðmundsdóttir kom Snæfelli þremur stigum yfir þegar tíu sekúndur lifðu leiks. Grindvíkingar brunuðu upp í sókn og Ashley Grimes skaut þriggja stiga skoti sem hitti og jafnaði metin, 58-58 og knúði fram framlengingu.

Þar var leikurinn í járnum. Snæfell skoraði fyrstu stigin en Grindvíkingar svöruðu. Forskot Íslandsmeistaranna var aðeins eitt stig allt þar til á lokamínútu framlengingarinnar. Þá komust Grindvíkingar yfir og unnu að lokum dramatískan þriggja stiga sigur, 69-66 í miklum spennuleik.

Pálína Gunnlaugsdóttir var atkvæðamest Snæfellskvenna með 17 stig og sjö fráköst. Gunnhildur Gunnarsdóttir var með 16 stig og sjö fráköst einnig og Helga Hjördís Björgvinsdóttir skoraði tíu stig. Áðurnefnd Ashley Grimes var atkvæðamest Grindvíkinga með 24 stig og 16 fráköst.

Eftir leikinn er Snæfell í þriðja sæti deildarinnar með átta stig, jafn mörg og lið Skallagríms í sætinu fyrir ofan. Næsti leikur Snæfells fer miðvikudaginn 2. nóvember þegar liðið tekur á móti Keflavík í Stykkishólmi. Búist er við að þá leiki nýr leikmaður Snæfells, Aaryn Ellenberg, sinn fyrsta leik fyrir liðið, en henni er ætlað að fylla skarð Taylor Brown.

Snæfell varð að lúta í gras eftir framlengingu