Skallagrímur tók á móti ÍR í Domino‘s deild karla í körfuknattleik í gærkvöldi. Bæði lið höfðu einn sigur hvort eftir þrjá leiki og gátu með sigri lyft sér upp að miðri stigatöflunni. Skallagrímur byrjaði mjög vel en að lokum voru það ÍR-ingar sem fóru með sigur af hólmi 78-84. Skallagrímsmönnum gekk illa að höndla með knöttinn, töpuðu honum alls 26 sinnum og var það banabiti liðsins í leiknum.

Sem fyrri segir byrjuðu Borgnesingar af miklum krafti. Þeir komust í 11-2 í upphafi leiksins en eftir það hrundi varnarleikur liðsins og ÍR-ingar jöfnuðu metin áður en fyrsti leikhluti var úti. Liðin fylgdust að í upphafi annars fjórðungs en eftir það tóku gestirnir góðan sprett og náðu 13 stiga forystu. En Skallagrímsmenn spyrntu við fótum og náðu að minnka muninn í fimm stig í hálfleik, 36-41.

Snemma síðari hálfleiks náðu gestirnir aftur yfirhöndinni í leiknum og náðu 17 stiga forskoti um miðjan þriðja leikhluta. Skallagrímsmenn komu til baka og minnkuðu muninn í átta stig en ÍR-ingar áttu lokaorð leikhlutans og höfðu góða tólf stiga forystu fyrir lokafjórðunginn.

Gestirnir héldu forskoti sínu afgerandi fyrstu mínútur fjórða leikhluta en eftir það tóku Skallagrímsmenn á sig rögg. Þeir héldu ÍR-ingum stigalausum í fjórar mínútur og söxuðu jafnt og þétt á forskot þeirra. En því miður fyrir Borgnesinga þá dugði góður leikkafli þeim ekki til að stela sigrinum. ÍR-ingar unnu að lokum með sex stigum, 78-84.

Flenard Whitfield skoraði 25 stig fyrir Skallagrím, reif niður 17 fráköst og gaf fimm stoðsendingar. Kristófer Gíslason skoraði 13 stig og tók ellefu fráköst, Sigtryggur Arnar Björnsson skoraði 13 stig einnig og Darrel Flake var með tíu stig og sjö fráköst.

Skallagrímur er eftir leikinn í 9. sæti deildarinnar með tvö stig eftir fjóra leiki, jafn mörg og Haukar, Þór Ak. og Njarðvík. Síðastnefnda liðið er einmitt næsti andstæðingur Skallagrímsmanna. Þau mætast í Njarðvík.föstudaginn 4. nóvember næstkomandi.

Misstu boltann og þar með sigurinn úr greipum sér