Lista- og menningarhátíðin Vökudagar hófst formlega á Akranesi í gær með opnun fjölda sýninga og afhendingu menningarverðlauna Akraneskaupstaðar. Í kjölfarið tekur við fjöldi list- og menningarviðburða út um allan bæ. Menningarverðlaun Akraness 2016 voru veitt Club 71, en það er félagsskapur Skagamanna sem fæddir eru 1971. Félagið hefur staðið fyrir fjölda viðburða á Akranesi á undanförnum árum þar sem helst ber að nefna árlegt þorrablót Skagamanna, sem meðlimir undirbúa og framkvæma í sjálfboðavinnu, og fjölsóttan brekkusöng á Írskum dögum. Ágóði þorrablótsins hefur runnið til íþrótta- og menningarstarfs á Akranesi. Þorrablótin hafa vaxið ár frá ári og eru afar vinsæl og vel sótt.

Regína Ásvaldsdóttir bæjarstjóri setti Vökudaga formlega í gær á Safnasvæðinu. Hún gat þess að hátíðin hafi nú verið haldin frá árinu 2002 og hafi sífellt verið að vaxa fiskur um hrygg. Jafnframt voru þrjár sýningar opnaðar á Safnasvæðinu. „Hver vegur að heiman er vegur heim,“ sýning Gyðu L. Jónsdóttur Wells, „Skart við skóna,“ sýning Dýrfinnu Torfadóttur og sýningin „Bannárin, brennivínið og bæjarbytturnar“ í umsjón þeirra Gerðar Jóhannsdóttur héraðsskjalavarðar og Nönnu Þóru Áskelsdóttur deildarstjóra á Ljósmyndasafni Akraness.

Ljósmyndaklúbburinn Höfrungur stendur fyrir ljósmyndasýningu á þriðju hæð Akranesvita. Á annarri hæð vitans er ljósmyndasýning Marc Koegels sem hefur verið frá því í september síðastliðnum og á fjórðu hæð sýna nemendur leikskóla á Akranesi listaverk í tengslum við Akranesvita og Breið.

Í Pennanum Eymundson er handavinnusýning starfsfólks Leikskólans Vallarsels. Ýmis handavinna til sýnis, sem þeir hafa unnið að bæði nýlega og áður. Þá opna jafnframt leikskólabörn á Vallarseli sýningu í Tónlistarskóla Akraness undir heitinu „Langisandur og umhverfið okkar“, leikskólabörn á Akraseli opna myndlistasýninguna „Ég og fjölskyldan mín” í húsnæði Bónus að Smiðjuvöllum 32, leikskólabörn á Teigaseli opna „Myndlistarsýningu barna” í setustofu Heilbrigðisstofunar Vesturlands og leikskólabörn á Garðaseli opna ljósmyndasýningu á Dvalarheimilinu Höfða undir heitinu „Það sem augað mitt sér“. Á Bókasafni Akraness er boðið upp á sýninguna „Þetta vilja börnin sjá” Sýningin samanstendur af myndskreytingum í íslenskum barnabókum eftir tuttugu myndlistarmenn sem gefnar voru út á árinu 2015.

Listakonan Sylvía Vinjars verður með myndlistasýningu á Skökkinni á Vökudögunum.

Í Tónlistarskólanum á Akranesi er ljósmyndasýningin og kvikmyndin „Töfrar himins”. Ljósmyndasýningin er aðgengileg á opnunartíma skólans en kvikmyndin verður sýnd sunnudaginn 30. október og sunnudaginn 6. nóvember kl. 14 og 16. Jafnframt verður opið á ljósmyndasýninguna þá sunnudaga frá kl. 13-17. Ljósmyndir og kvikmynd er eftir Jón R. Hilmarsson og tónlist í kvikmynd er eftir Alexöndru Chernyshovu.

Lesendur eru hvattir til að kynna sér dagskrá Vökudaga, en hún er m.a. kynnt ítarlega í Skessuhorni vikunnar.

Forsvarsmenn Akraneskaupstaðar ásamt þeim sem stóðu að opnun listsýninga á Safnasvæðinu í gær. Þeim var afhent blóm.

Kirkjukór Akraness söng við opnun sýningar Gyðu Jónsdóttur Wells.

Hér má sjá hluta af verkum Gyðu Jónsdóttur Wells sem opin verður í Safnaskálanum út nóvember. Lesa má viðtal við Gyðu í síðasta Skessuhorni, þar sem hún segir m.a. frá tilurð sýningarinnar.

Í Stúkuhúsinu var opnuð sýningin „Bannárin, brennivínið og bæjarbytturnar.“ Þar er fjallað um forsögu þess að vínbannið var sett á og þær hreyfingar sem börðust fyrir banninu t.d. templara og ungmennafélögin.

Gunnar Kvaran og Haukur Guðlaugsson spiluðu við opnun listsýninga í Safnaskálanum.

Dýrfinna Torfadóttir gullsmiður opnaði sýninguna Skart við skóna í anddyri Safnaskálans.

Karen Jónsdóttir og Anna Leif Elídóttir í húsnæði Café Kaju og Gallerí Urmuls við Kirkjubraut. Þar var opnuð sýningin „Selfí“ þar sem börn sýndu afrakstur portrettmyndanámskeiðs sem þau sátu hjá Önnu Leif.

Hér tekur Anna Leif Elídóttir selfí af sér og málverki sem hún gerði eftir ljósmynd af sér á unglingsárum.

Hekla var ein þeirra sem sýndu á sýningunni Selfí.

Stefanía Ottesen við mynd af sér.

Árný Örnólfsdóttir við mynd af sér á sýningunni Selfí.

Lista- og menningarhátíðin Vökudagar hafin á Akranesi