Elsa Lára Arnardóttir skipar annað sæti á lista Framsóknarflokksins í Norðvesturkjördæmi fyrir kosningarnar á laugardaginn. Elsa Lára ólst upp í Stóra – Lambhaga og á Akranesi til ellefu ára aldurs en flutti þaðan austur á Hornafjörð. Hún hafði alltaf sterkar taugar til Akraness og kom því til baka og hóf nám við Fjölbrautaskóla Vesturlands á Akranesi og hefur síðan búið á Akranesi frá árinu 2000 þar sem hún vill búa. ,,Ég saknaði alltaf ömmu og afa en þau ólu mig upp að miklu leyti því mamma var svo ung þegar hún átti mig. Þeirra vegna ákvað ég að snúa til baka.” Elsa Lára er menntaður grunnskólakennari en mikill áhugi á stjórnmálum leiddi hana út í bæjarpólitík á Akranesi og þaðan lá leiðin í framboð til Alþingis. „Ég hef sterkar skoðanir, en ég hafði ekkert ætlað mér að fara út í pólitík,“ segir hún. Þegar Ásmundur Einar Daðason, þingmaður Framsóknarflokksins, hringdi í hana einn daginn og bauð henni að taka þriðja sæti á lista Framsóknarflokksins fyrir síðustu kosningar segir hún að það hafi komið nokkuð flatt upp á sig. „Ég hafði aldrei heyrt neitt jafn fyndið, mér fannst þetta svo fjarri lagi,“ segir hún og hlær. Gunnar Bragi Sveinsson og Ásmundur Daði hafi þó gengið á eftir henni og hún samþykkti að lokum að taka sætið. Flokkurinn fékk síðan mikið fylgi í kosningunum og fjóra menn á þing úr kjördæminu.

Sérhæfðar heilbrigðisstofnanir á landsbyggðinni

Elsa Lára segir að þingstörf séu mjög svipuð starfi grunnskólakennara. „Ég held að kennaranámið sé mjög góður undirbúningur fyrir hin ýmsu störf. Það er margt töluvert líkt með þingstörfum og kennarastarfinu. Það er svo stór hluti af starfinu sem er ekki sýnilegur eins og undirbúningur hinna ýmsu mála.“ Hún segir að reynslan af þingstörfum hafi styrkt hana mjög mikið. „Það að standa með sjálfum sér og vera sáttur við sínar ákvarðanir er ótrúlega góður skóli.“ Þá hafi hún einnig lært þolinmæði, en hún segir að hún verði seint talin þolinmóðasti þingmaðurinn því hún vilji sjá verkin ganga hraðar. „Það þarf að auka samtal inni á þinginu, milli flokka sem og milli stjórnar og stjórnarandstöðu, til að skapa meiri skilvirkni.“

Á þessu þingi hefur Elsa Lára verið varaformaður velferðarnefndar og sá málaflokkur átt hug hennar og hjarta. Hún leggur mikla áherslu á heilbrigðismálin og vill efla heilbrigðisstofnanir á landsbyggðinni. „Okkur finnst mikilvægt að skilgreina hvernig þjónustu við viljum hafa um allt landið.“ Hún bætir við að það sé ekki þar með sagt að það verði fullbúnar skurðstofur á öllum heilbrigðisstofnunum. Hún sjái þó möguleika á því að dreifa álaginu af Landspítalanum með því að sérhæfa heilbrigðisstofnanir úti á landi. „Það þarf að meta þjónustuþörf út frá samfélaginu, aldurssamsetningu, íbúaþróun, samgöngum, atvinnu og fleiru svo hægt verði að hrinda í framkvæmd áætlun okkar flokks; Heilbrigðisáætlun fyrir Ísland. Í framhaldi af því þarf að auka fé í málaflokkinn.“ Elsa Lára tekur dæmi um Heilbrigðisstofnun Vesturlands á Akranesi sem hún segir að gæti vel aukið við sig í liðskiptaaðgerðum og aðgerðum á kvennadeild. Annað dæmi sé að efla enn frekar bakdeildina í Stykkishólmi. „Ég tel að við eigum sóknarfæri í því að efla heilbrigðisstofnanir um landið í sérhæfðum verkefnum og minnka um leið álagið á Landspítalann.“ Nú standi til dæmis ein deild tóm á sjúkrahúsinu á Akranesi sem auðveldlega væri hægt að nýta betur.

Velferðarkerfi að norrænni fyrirmynd

Fjöldi fólks hefur komið ábendingum um staðsetningu nýs Landspítala á framfæri til meðal annars Framsóknarflokksins. Á meðal þeirra sem senda ábendingar eru heilbirgðisstarfsmenn. Eftir að hafa heyrt og lesið mikla gagnrýni á staðsetningu nýs Landspítala við Hringbraut hafa Framsóknarmenn tekið þá afstöðu að nýr Landspítali ætti að vera byggður á öðrum stað en við Hringbraut. Elsa Lára segir ekki of seint að huga að nýrri staðsetningu. Húsin sem nú þegar er byrjað að byggja við Hringbraut sé hægt að nota til að efla núverandi Landspítala á meðan bygging á nýjum spítala fer fram. „Okkur finnst það ábyrgðarverk að sjá hvort við getum gert okkar ágæta heilbrigðiskerfi betra með því að byggja hraðar upp nýjan Landspítala á öðrum stað og efla um leið heilbrigðisstofnanir á landsbyggðinni.“

Elsa Lára segir að Framsóknarflokkurinn hafi mikið horft til Norðurlandanna til að leita lausna. Til dæmis væri hægt að bæta úr skorti á læknum á landsbyggðinni með því að koma upp hvatakerfi sem á sér fyrirmynd í Noregi. Þannig myndu læknar og annað sérhæft starfsfólk fá afslátt af námslánum sínum, ef þeir fastráða sig á heilbrigðisstofnunum úti á landi til nokkurra ára. Einnig eru uppi hugmyndir um að koma á skattaafslætti vegna ferða til og frá vinnu. „Ef það yrði að veruleika myndi það nýtast vel íbúum á Akranesi, sem eru að sækja vinnu í stórum stíl til höfuðborgarinnar. Það er oft mikill íþyngjandi kostnaður sem fylgir akstrinum.“ Þá snýst ein hugmynd flokks hennar um að lækka tryggingagjald til fyrirtækja sem færa starfsemi sína út fyrir höfuðborgarsvæðið.

Vill halda áfram á þingi

Til að létta álagið á millitekjufólk segir Elsa Lára að Framsóknarflokkurinn vilji lækka skatta á þann tekjuhóp. Sá hópur myndi þá aðeins borga 25% skatt, en hátekjufólk myndi borga 43% skatt. Samkvæmt þessum hugmyndum yrðu skatttekjur ríkisins óbreyttar frá því sem þær eru nú. Aðalmarkmið þeirrar aðgerðar væri að koma á vinnuhvetjandi skattkerfi og efla millistéttina.

Sumar skoðanakannanir benda til þess að litlu muni að Elsa Lára nái þingsæti. “Það er rétt að litlu munar. Því vona ég að kjósendur meti störf mín því ég vil halda áfram að gæta hagsmuna kjördæmisins og þjóðarinnar en til þess þarf ég vitanlega örugga kosningu,” segir hún og bætir við að endingu að hún sé mjög þakklát fyrir þann stuðning sem hún hefur fengið hingað til.

Segir eflingu heilbrigðisþjónustu á landsbyggðinni mikið forgangsmál