Hrútasýning fjárræktarfélaganna á Mýrum var haldin að Lækjarbug sunnudaginn 23. október. Sýndir voru 36 lambhrútar sem er sami fjöldi og árið áður. Veittar voru viðurkenningar fyrir þrjá bestu hrútana í þremur flokkum. Dómarar voru Jón Viðar Jómundsson og Kristbjörn Haukur Steinarsson.

Í flokki kollótra var talinn bestur hrútur nr. 58 frá Lækjarbug, faðir Serkur 13-941. Í öðru sæti nr.6 frá Háhóli undan Baug 10-889. Í þriðja sæti varð hrútur nr. 314 frá Leirulæk undan Helmingi.

Tíu mislitir hrútar mættu þetta árið. Bestur var svartflekkóttur hrútur frá Mel nr. 29 undan Salamon 10-906. Annar varð golsóttur frá Rauðanesi III nr. 334 undan Kalda 12-950 og þriðja sætið kom í hlut grás hrúts frá Leirulæk nr. 33 undan Kornelíusi 10-945.

Bestur í flokki hvítra hyrndra var hrútur frá Skiphyl nr. 6023 undan Garra 11-453. Í öðru sæti hrútur frá Háhóli nr. 453 undan Hamri 14-088 sem er ættaður frá Hesti og þriðja sætið hlaut lamb nr. 6156, faðir Klemmi 15-350 á Skiphyl.

Besti hrútur sýningarinnar var svo valinn nr. 6023 frá Skiphyl og varðveita því hjónin Kristjana og Sigfús skjöldinn góða næsta árið en þau áttu líka hrútinn í þriðja sætinu.

Fegurðarsamkeppni gimbra var mjög hörð, mikið aginterað og plottað. Þar var unga fólkið í mikilli kosningabaráttu og miklu meiri en frambjóðendur til Alþingis þessa dagana, en engin þeirra lét sjá sig á sýningunni. Þrjár gimbrar stóðu efstar og jafnar með ellefu atkvæði hver. Lífland styrkti sýninguna og gaf vörur sem fyrirtækið er með til sölu.

Mýramenn fjölmenntu eins og jafnan áður og fóru glaðir heim með góða ræktunargripi sem vonandi stuðla að betra verði á sauðfjárafurðum á næstu árum.

Bestur kveðjur,

Guðbrandur Guðbrandsson á Staðarhrauni.

Hrútasýning á Mýrunum