Heil umferð var leikin í Domino‘s deild kvenna í körfuknattleik í gærkvöldi. Snæfell mætti Hauka að Ásvöllum, en liðin mættust síðast í vor í oddaleik um Íslandsmeistaratitilinn þar sem Snæfell hafði betur, eins og kunnugt er. Miklar breytingar hafa orðið á liði Hauka frá því í vor og liðið ekki talið jafn sterkt og þá. Snæfell sigraði enda leikinn örugglega, 42-69.

Jafnt var á með liðunum út fyrsta leikhluta og virtist sem Haukakonur ætluðu að standa vel í Íslandsmeisturunum, sem leiddu með þremur stigum fyrir annan leikhluta. Snæfell bætti lítið eitt við forskot sitt næstu mínúturnar en um miðjan fjórðunginn urðu algjör þáttaskil í leiknum. Varnarleikur Snæfells small saman, Haukar skoruðu ekki körfu það sem eftir lifði fyrri hálfleiks en á meðan stungu Snæfellskonur af og leiddu með 19 stigum í hálfleik, 22-41.

Leikkaflinn góði undir lok fyrri hálfleiksins lagði grunn að öruggum sigri Snæfellskvenna. Þær bættu hægt og rólega við forskot sitt allt til leiksloka og Haukar sáu aldrei til sólar. Að lokum munaði 27 stigum á liðunum, Snæfell sigraði 42-69.

Fyrirliðinn Gunnhildur Gunnarsdóttir var stigahæst í liði Snæfells með 23 stig og þrjár stoðsendingar. Þá skoraði Taylor Brown 18 stig, tók sex fráköst og gaf fjórar stoðsendingar.

Leikurinn á laugardag hefst kl. 14:30

Næsti leikur Snæfells fer fram í Stykkishólmi á laugardaginn, 22. október, þegar Stjarnan kemur í heimsókn. Rétt er að vekja athygli á því að leiknum hefur verið flýtt um hálfa klukkustund frá því sem upphaflega hafði verið auglýst, að því er segir í tilkynningu frá Körfuknattleikssambandi Íslands. Hefst leikurinn því klukkan 14:30 en ekki 15:00 eins og áður var gert ráð fyrir.

Snæfell vann öruggan sigur á Haukum