Skallagrímur mætti Keflavík suður með sjó í Domino‘s deild kvenna í körfuknattleik í gær. Keflavík hafði yfirhöndina lungann úr leiknum en Skallagrímskonur komu til baka og náði að knúa fram framlengingu. Þær urðu þó á endanum að játa sig sigraðar því Keflavík hafði sigur, 81-70

Skallagrímskonur komu ákveðnar til leiks og höfðu yfirhöndina framan af fyrsta leikhluta. En Keflavíkur liðið komst smám saman inn í leikinn og náðu forystunni. Liðin köstuðu síðan forskotinu á milli sín áður en fyrsti leikhluti var úti en að honum loknum leiddi Keflavík með einu stigi og útlit fyrir spennandi leik. Heimakonur leiddu áfram fram undir miðjan annan fjórðung en Skallagrímskonur fylgdu þeim eins og skugginn. Þá náði Keflavík góðum kafla og níu stiga forystu en Skallagrímur svaraði og munurinn fimm stig í hálfleik, 32-27.

Leikurinn var í járnum í upphafi síðari hálfleiks og jafnt á öllum tölum. Skömmu fyrir miðjan þriðja leikhlutann náðu Keflvíkingar síðan góðum leikkafla og leiddu með níu stigum fyrir lokafjórðunginn. Skallagrímskonur minnkuðu muninn hægt og sígandi en þegar nær dró leiks lokum leit út fyrir að þær ætluðu ekki að hafa erindi sem erfiði. Þær lögðu síðan allt í sölurnar á síðustu 90 sekúndum leiksins og náðu að jafna 66-66 og knýja fram framlengingu á dramatískan hátt.

Keflavík hóf framlenginguna á því að setja niður þriggja stiga skot en Skallagrímur svaraði með tveimur körfum og komst yfir, 69-70. Þá sneri Keflavík taflinu hins vegar sér í vil, náði forskotinu á nýjan leik og hélt allt til loka en Skallagrímskonum tókst ekki að svara. Keflavík hafði því sigur, 81-70 í spennandi og skemmtilegum leik.

Sigrún Ámundadóttir var atkvæðamest Skallagrímskvenna í leiknum. Hún skoraði 22 stig, tók tíu fráköst og gaf sex stoðsendingar. Tavelyn Tillman skoraði 17 stig, tók fimm fráköst og gaf sex stoðsendingar. Jóhanna Björk Sveinsdóttir skoraði ellefu stig og tók níu fráköst.

Skallagrímur leikur næst laugardaginn 22. október næstkomandi þegar liðið tekur á móti Haukum í Borgarnesi.

Skallagrímskonur urðu að játa sig sigraðar í framlengingu