Í fyrrakvöld fékk Björgunarsveitin Heiðar í Borgarfirði útkall vegna ferðamanna sem höfðu fest bíl sinn við vaðið yfir Mjódalsá inn af Langavatnsdal. Þegar þangað var komið beið björgunarsveitarmanna hins vegar aðeins harðlæstur bíllinn en engir ferðamenn. Ákveðið var að kalla eftir aðstoð Björgunarsveitarinnar Brákar í Borgarnesi, fá þá til að fara inn Grenjadal og hitta á leitarmenn Álfthreppinga, sem voru í smalamennsku á svæðinu, til að athuga hvort ferðamennirnir væru hjá þeim. Jafnframt var ákveðið að fá Björgunarsveitina Ósk úr Búðardal til að koma að Sópandaskarði ef ske kynni að fólkið hefði gengið í þá áttina. En það gekk ekki þrautalaust að kalla eftir aðstoð. Engin leið var að hringja í smalana eða kalla eftir aðstoð annarra björgunarsveita því farsímasamband er ekkert á Langavatnsdal. Auk þess gekk erfiðlega að ná tetrasambandi. Það hafðist þó að lokum og kallað var eftir aðstoð. Þegar Brákarmenn fundu síðan smalana kom í ljós að ferðamennirnir höfðu slegist í för með þeim og voru heilir á húfi. Brákarmenn þurftu þá að aka svolítinn spotta til baka til að komast í fjarskiptasamband, til að hægt væri að láta hinar björgunarsveitirnar vita svo þær gætu snúið heim á leið.

: Bíllinn stóð á hallandi móhellu og ekki þorandi að hreyfa hann. Ljósm. Björgunarsveitin Heiðar.

„Lærdómur þessa útkalls er sá að það bráðvantar að koma upp GSM og Tetra sambandi á Langavatnsdal. Þetta er orðið mjög aðkallandi vandamál eftir að þetta svæði varð svona vinsælt sérstaklega hjá gönguhópum,“ segir á Facebook síðu Björgunarsveitarinnar Heiðar, en sífellt fleiri hópar ganga vatnaleiðina svokölluðu, frá Hítarvatni að Langavatni og þaðan yfir að Hreðavatni. „Langbest væri að setja upp sendi á Staðarhnúkinn sem er fjallið suðaustur af Langavatninu. Það fjall er staðsett þannig að það ætti að geta gefið samband inn í dalina í kringum Langavatnið,“ segir á Facebook síðu björgunarsveitarinnar.

: Svipmynd frá vettvangi. Ljósm. Björgunarsveitin Heiðar.

Slæmt fjarskiptasamband var björgunarsveitarmönnum til trafala