Októbermánuður hefur um nokkurra ára skeið verið tileinkaður vitundarvakningu um krabbamein í konum. Bleika slaufan hefur verið boðin til sölu sem hluti af árverkniátaki Krabbameinsfélagsins og til styrktar félaginu, eins og landsmenn þekkja. Í ár er kastljósinu beint að brjóstakrabbameini, sem er algengasta tegund krabbameins meðal íslenskra kvenna. Áætlað er að á 40 klukkustunda fresti greinist kona með brjóstakrabbamein á Íslandi allt árið um kring.

Bleiki dagurinn er annar liður í árverkniátaki Krabbameinsfélagsins, en 14. október ár hvert eru landsmenn hvattir til að sýna samstöðu, klæðast bleiku og hafa bleikt í fyrirrúmi. Sú hefð hefur skapast á Akranesi að Krabbameinsfélag Akraness og nágrennis málar bæinn bleikan og efnir til bleikrar stuðningsgöngu daginn áður, 13. október. Gengið er frá stjórnsýsluhúsi bæjarins og niður á Akratorg. Gærdagurinn var þar engin undantekning. Arkað var af stað frá stjórnsýsluhúsinu kl. 18. Leiðinlegt veður olli því að þátttaka var minni en oft áður, en vaskur hópur lét það þó ekki aftra sér og gekk bleikklæddur niður að Akratorgi, sem að venju var sveipað bleikum lit.

Skátar úr Skátafélagi Akraness voru með kakósölu til styrktar Krabbameinsfélagi Akraness og nágrennis, Steinunn Sigurðardóttir ávarpaði gönguhópinn og Jensína Valdimarsdóttir var útnefndur slaufuberi félagsins árið 2016.

Bleikur litur áberandi síðasta föstudag_2NOTA

Bleiki dagurinn er í dag