Frá þriðjudegi og til dagsins í dag gerði óvenjulega mikla úrkomu hér á landi. Lægðin var eftirstöðvar fellibylsins Matthíasar sem varð að fellibyl á Karabíska hafinu en teygði síðan anga sína hingað. Miðað við mælingar Veðurstofunnar rigndi mest á Barðaströnd, Snæfellsnesi og á svæðinu við Mýrdalsjökul. Bráðnun var mikil í jöklum og raunar má segja að það hafi verið happ að ekki hafði snjóað í fjöll. Þrátt fyrir að vatn ykist mikið í ám og lækjum er ekki kunnugt um skemmdir af völdum vatnavaxta. Meðfylgjandi eru myndir af þremur vatnsföllum á vestanverðu landinu.

Geitá, ofan við Húsafell í Borgarfirði, er venjulega fremur sakleysisleg, en á miðvikudag er talið að vatnsmagnið hafi fimmfaldast og flæddi hún yfir bakka sína. Myndina tók Páll Jökull Pétursson og birtist hún fyrst á RUV.is Til gamans má geta þess að einn Borgfirðingur skrifaði við þessa mynd: „Það er engu líkara en að jöklarnir Ok og Langjökull, sem í gær voru gerðir að þjóðlendu, séu að flýja til sjávar. Guð hefur talað.“

Kirkjufellsfoss við Grundarfjörð var töluvert stærri en hann á að venjast. Ljósm. Tómas Freyr Kristjánsson.

Vatnavextir talsverðir í úrhellisrigningu