Snæfell vann hádramatískan sigur á Val þegar liðin mættust í Dominos ‘s deild kvenna í körfuknattleik í gær. Leikurinn var jafn og spennandi frá upphafi til enda og úrslitin réðust ekki fyrr en á lokasekúndunum.

Snæfell hafði yfirhöndina í fyrsta leikhluta en leikurinn fór fremur rólega af stað hvað stigaskorun varðar, en staðan var 12-7 eftir upphafsfjórðunginn. Snæfellskonur komu ákveðnar til annars leikhluta og komust fljótt tíu stigum yfir. Valskonur voru hins vegar ekki á þeim buxunum að láta þær stinga sig af og svöruðu með góðum leikkafla. Snæfell var hins vegar feti framar allan fyrri hálfleikinn og leiddi verðskuldað í leikhléi, 33-28.

Jafnræði var með liðunum í byrjun fyrri hálfleiks en um miðjan þriðja leikhluta varð viðsnúningur á leik Valskvenna. Þær hertu varnarleik sinn, voru ákveðnar í sókninni og fráköstuðu vel. Valur komst átta stigum yfir og Snæfellskonur náðu ekki að svara fyrr en undir lok leikhlutans þegar Taylor Brown tók málin í sínar hendur. Hún byrjaði á að setja niður tvö vítaskot, stal síðan boltanum í tvígang og bætti við fjórum stigum til viðbótar og Snæfell aðeins tveimur stigum frá Val fyrir lokafjórðunginn. Snæfell jafnaði metin en Valur komst aftur yfir. Snæfellskonur minnkuðu muninn niður í eitt stig þegar þrjár mínútur lifðu leiks en Valur virtist ætla að sigla naumum sigri heim þegar Snæfell fékk eina tilraun til viðbótar með síðustu sókn leiksins. Skotið geigaði en Helga Hjördís Björgvinsdóttir náði gríðarlega mikilvægu sóknarfrákasti þegar nokkrar sekúndur voru eftir. Hún kom boltann á Andreu Björtu Ólafsdóttur vinstra megin í teignum. Andrea lét vaða og lokaflautan gall á meðan boltinn var í loftinu. En ofan í fór boltinn og Snæfell vann eins stigs sigur, 59-61. Voru þetta einu stig Andreu í leiknum og komu þau aldeilis á ögurstunu og tryggðu Snæfelli annan sigurinn í tveimur leikjum deildarinnar.

Taylor Brown var atkvæðamest Snæfellskvenna í leiknum með 24 stig, átta fráköst og sjö stolna bolta. Næst henni kom Gunnhildur Gunnarsdóttir með 15 stig, fjögur fráköst og fjórar stoðsendingar.

Næsti leikur Snæfells er eftir viku, miðvikudaginn 19. október næstkomandi í Stykkishólmi þegar Haukar koma í heimsókn. Þessi tvö lið mættust síðast í úrslitakeppninni um Íslandsmeistaratitilinn í vor þar sem Snæfell hafði betur, sem kunnugt er.

Snæfell sigraði Val á flautukörfu