Skagamenn og nærsveitarfólk hafa nú í þrjár vikur haft færi á því að taka þátt í nýrri rannsókn sem lýtur blóðskimun vegna mergæxlis. Fjólubláa umslagið hefur verið borið í öll hús og eru allir hvattir til að taka þátt í þessari rannsókn, en Akranes og nágrenni eru hluti af forkönnun fyrir Þjóðarátak gegn mergæxlum, sem hefst formlega um miðjan nóvember. Viðtökur á Akranesi eiga þannig að vera hvatning til annarra landsmanna.

„Við fórum í þessa forkönnun, sendum upplýsingabæklinginn, fjóubláa umslagið, í öll hús á Akranes og nánasta umhverfi. Við vildum sjá að upplýsingaefnið kæmist til skila og heimasíðan og upplýsta samþykkið virkuðu,“ segir Sigurður Yngvi Kristinsson, sérfærðingur í blóðsjúkdómum og prófessor við HÍ, en hann er ábyrgðarmaður rannsóknarinnar, en markmið hennar er að meta hvort ávinningur sé af því að skima fyrir forstigi mergæxli.

Sigurður Yngvi segir að viðtökur Skagamanna hafi verið góðar. Akranes hafi verið valið til að taka þátt í forkönnuninni af því að íbúar þar séu jákvæðir í garð rannsókna, bæjarfélagið sé af hæfilegri stærð og sé í hæfilegri fjarlægð við háskólann. „Þátttakan hefur verið framar björtustu vonum, nú þegar. Þó ekki séu liðnar nema þrjár vikur eru þegar 37% af úrtakinu búin að skrá sig, ýmist á netinu eða með því að senda okkur pappírsumslagið.“

Sigurður Yngvi hefur verið duglegur að kynna verkefnið fyrir Skagamönnum, hitt Lions-klúbba, farið á heilsugæsluna og talað við eldri borgara. Hann segir að ýmsar spurningar hafi vaknað hjá Skagamönnum. „Við höfum á tilfinningunni að það séu mjög margir áhugasamir sem vilji vera með, en eru þó ekki búnir að skrá sig. Sumir virðast halda að þeir þurfi að fara sérstaklega í blóðprufu fyrir rannsóknina, en svo er ekki. Við biðjum fólk bara um að skrá sig og næst þegar það fer í blóðprufu, á næstu þremur árum, þá fáum við sýnin. Það þarf ekki að gera annað en að skrá sig og það er hægt að gera á netinu. Ég skráði mig sjálfur og gat gert þetta á 27 sekúndum. Við hvetjum alla sem vilja vera með til að skrá sig á blodskimun.is eða senda okkur fjólubláa umslagið,“ segir Sigurður Yngvi að endingu.

Akranes verði hvatning til annarra landsmanna