Eftir góðan sigur á Snæfelli í fyrsta tímabilsins í Domino’s deild kvenna heimsótti Skallagrímur lið Stjörnunnar á laugardaginn. Leikurinn var fremur jafn en Stjarnan var ívið sterkari lungann úr leiknum og sigraði að lokum með ellefu stigum, 86-75, eftir æsispennandi lokafjórðung.

Skallagrímskonur byrjuðu betur og leiddu leikinn framan af fyrsta leikhluta. Stjarnan tók nokkrar mínútur í að komast í gang en sóttu að Skallagrími og tóku forystuna á lokamínútu upphafsfjórðungsins. Þær bættu í um miðjan annan leikhluta en Borgnesingar svöruðu og minnkuðu muninn í fjögur stig áður en flautað var til hálfleiks og útlit fyrir jafnan og spennandi síðari hálfleik.

Sú varð einmitt raunin. Stjarnan byrjaði betur eftir hléið en Skallagrímskonur voru aldrei langt undan. Þær fikruðu sig nær og nær og komust loks yfir snemma í lokafjórðungnum. Upphófust þá æsispennandi lokamínútur. Skallagrímskonur höfðu yfirhöndina, leiddu með tveimur til þremur stigum og leikurinn galopinn. Leikmenn Stjörnunnar höfðu verið ískaldir utan þriggja stiga línuna allan leikinn en hrukku skyndilega í gang þegar fimm mínútur voru eftir og settu tvo gríðarlega mikilvæga þrista og náðu forystunni á nýjan leik. Lagði það grunn að sigri þeirra í leiknum því Skallagrímur náði ekki að svara. Stjarnan bætti lítillega í síðustu mínúturnar sigraði með ellefu stigum, 86-75.

Tavelyn Tillman var stigahæst Skallagrímskvenna með 28 stig og fimm stolna bolta að auki. Sigrún Ámundadóttir var ekki langt undan í stigaskorun. Hún setti 26 stig og tók tíu fráköst.

Skallagrímur hefur því einn sigur og eitt tap úr fyrstu tveimur leikjum deildarinnar. Næsti leikur Skallagríms fer fram miðvikudaginn 12. október þegar liðið tekur á móti Grindvíkingum í Borgarnesi.

Þurftu að játa sig sigraðar eftir spennandi lokamínútur