Eftir tap gegn nágrönnum sínum í Skallagrími í fyrsta leik Domino‘s deildar kvenna var komið að fyrsta heimaleik Íslandsmeistara Snæfells sem leikinn var í gær. Gestirnir voru Njarðvíkingar, en liðunum er spáð mjög misjöfnu gengi í deildinni í vetur; Snæfelli efsta sætinu en Njarðvíkingum því neðsta. Í leiknum í gær sást greinilega hví spámennirnir röðuðu liðunum á sitt hvorn enda deildarinnar. Snæfell réði ferðinni allan leikinn og unnu mjög sannfærandi sigur, 84-59.

Gestirnir úr Njarðvík áttu mjög erfitt uppdráttar á fyrstu mínútum leiksins gegn sterkum og vel skipulögðum varnarleik Snæfellskvenna. Þær lokuðu á allar aðgerðir gestanna sem skoruðu aðeins fjögur stig fyrstu tíu mínútur leiksins. Á meðan skoruðu Íslandsmeistararnir 17 stig og lögðu grunn að öruggum sigri strax í fyrsta leikhluta. Munurinn átti aðeins eftir að aukast eftir því sem leið á. Gestirnir tóku þó aðeins við sér undir lok fyrri hálfleiks en það hafði lítið að segja, Snæfell leiddi með 21 stigi í hálfleik, 43-22.

Snæfellskonur komu til síðari hálfleiks með unninn leik í höndunum en slógu aldrei af. Þær héldu rúmlega 20 stiga mun og rúmlega það allt til loka. Yngri og mínútufærri leikmenn Snæfells sýndu áræðni í leik sínum og skiluðu góðu framlagi. Liðsheildin hefur lengi verið aðalsmerki Snæfellsliðsins og leikurinn á sunnudag gaf vísbendingu um að engin breyting hefði orðið þar á. Það var sama hver var á vellinum, allir skiluðu sínu og gestirnir áttu aldrei séns. Að lokum fór svo að Snæfell vann mjög sannfærandi 25 stiga sigur, 84-59.

Alls komust ellefu af þrettán leikmönnum Snæfells á blað í stigaskorun liðsins. Flest stig skoraði Taylor Brown, eða 27 talsins. Hún tók auk þess fimm fráköst og gaf fimm stoðsendingar. Berglind Gunnarsdóttir kom henni næst með 14 stig og Gunnhildur Gunnarsdóttir skoraði átta stig, gaf sjö stoðsendingar og tók sex fráköst.

Snæfell hefur því unnið annan af fyrstu tveimur leikjum vetrarins. Næsti leikur Snæfells fer fram annað kvöld, þriðjudaginn 11. október, þegar liðið heimsækir Val.

Liðsheildin var aðalsmerki Snæfells í sannfærandi sigri