Fyrsta umferð Domino‘s deildar kvenna í körfuknattleik hófst í gær. Sannkallaður Vesturlandsslagur var í Borgarnesi þar sem nýliðar Skallagríms tóku á móti ríkjandi Íslands- og bikarmeisturum Snæfells. Báðum liðum hefur verið spáð toppbaráttu í deildinni í vetur og leiksins var beðið með mikilli eftirvæntingu. Áhorfendur fjölmenntu á leikinn. Ekki var autt sæti í húsinu og mikil stemning og læti á pöllunum þar sem var sungið og trommað allan leikinn. Eins og reglur segja til um hófst leikurinn með uppkasti á miðjuhring. Dómari blés í flautu sína og kastaði boltanum upp í loftið. Eitt augnablik á meðan boltinn sveif í loftinu datt allt í dúnalogn en um leið og fyrsti leikmaður snerti boltann ætlaði allt um koll að keyra. Langþráð keppnistímabilið var hafið og körfuboltaveturinn framundan.

Skallagrímur byrjaði leikinn af miklum krafti og sigldu Íslandsmeistarana nánast í kaf á fyrstu mínútum leiksins með öflugum varnarleik og hröðum sóknum. Snæfell var lengi að finna taktinn og sama hvað þær reyndu þá fór ekkert niður. Allt gekk á afturfótunum hjá þeim og á tímabili hefðu þær ekki getað keypt sér körfu. Á meðan röðuðu Skallagrímskonur inn stigunum hinum megin og staðan eftir fyrsta leikhluta 23-7.

En aldrei skyldi afskrifa Snæfellskonur. Þær þéttu sig heldur betur í vörninni og gerðu Skallagrímsliðinu erfitt fyrir. Góður varnarleikur skilaði þeim auðveldum körfum eftir hraðar sóknir og skotin fóru að detta. Tókst þeim að minnka muninn niður í sex stig og staðan 37-31 þegar hálfleiksflautan gall.

Eftir leikhléið var mikið jafnræði með liðunum og hart barist um hvern bolta. Um miðjan þriðja leikhluta tóku Skallagrímskonur hins vegar að síga fram úr á nýjan leik en Snæfellskonur voru hvergi nærri hættar. Þær áttu mjög góðan kafla í upphafi lokaleikhlutans og tókst að minnka muninn í tvö stig þegar sex mínútur lifðu leiks. Nær komust þær hins vegar ekki því Skallagrímur skoraði góðar körfur og sigldi að lokum sigrinum heim. Lokatölur í Borgarnesi því 73-62 í mjög kaflaskiptum en spennandi og skemmtilegum körfuboltaleik.

Tavelyn fór á kostum

Tavelyn Tillman fór á kostum í leiknum og skoraði hvorki fleiri né færri en 38 af 73 stigum Skallagríms og tók níu fráköst að auki. Hún skaut afar vel utan af velli, hitti úr 70% þriggja stiga skota sinna og 60% alls. Þar að auki rötuðu öll sjö vítaskot hennar rétta leið.
Næst henni kom Ragnheiður Benónísdóttir með tólf stig og níu fráköst og þá skoraði Sigrún Ámundadóttir átta stig, reif niður 14 fráköst og gaf fimm stoðsendingar.

Stigahæst í liði Snæfells var Taylor Brown með 19 stig, fjögur fráköst og fimm stolna bolta. Næst henni kom Gunnhildur Gunnarsdóttir með 13 stig, sjö stoðsendingar, sex stolna bolta og fjögur fráköst og Helga Hjördís Björgvinsdóttir skoraði ellefu stig og tók sex fráköst.

Næstu leikir

Það er stíf dagskrá fyrstu vikur Íslandsmótsins. Skallagrímur leikur næst laugardaginn 8. október næstkomandi þegar liðið heimsækir Stjörnuna. Daginn eftir, sunnudaginn 9. október, tekur Snæfell á móti Njarðvík í fyrsta heimaleik vetrarins.

Skallagrímur sigraði Vesturlandsslaginn