Hópur íbúa á Akranesi hefur hrundið af stað undirskriftasöfnun þar sem skorað er á bæjaryfirvöld á Akranesi að auka niðurgreiðslur vegna gæslu barna og rýmka reglur um aldur þeirra við innritun í leikskóla. „Við skorum á bæjaryfirvöld á Akranesi að endurskoða reglur varðandi niðurgreiðslur til foreldra með börn hjá dagforeldrum og innritunarreglur í leikskóla bæjarins. Ástæðan er einföld; niðurgreiðslan hjá Akraneskaupstað er töluvert lægri en í flestum ef ekki öllum bæjarfélögum á landinu,“ segir í kynningu vegna áskorunarinnar.

Hópurinn nefnir sem dæmi að í Kópavogi fá foreldrar greitt ríflega 17.000 krónum meira og í Garðabæ og Borgarnesi ríflega 23.000 krónum meira en foreldrar á Akranesi fá. Mismunurinn er enn meiri þegar einstæðir foreldrar eiga í hlut. „Síðan eru það elsku börnin sem eru fædd snemma á árinu og eru orðin fullorðin þegar þau loksins komast inn í leikskólana. Þessi umræða hefur verið töluvert í fjölmiðlum og margir sem hafa kvartað,“ segir Margrét Egilsdóttir sem er í forsvari fyrir undirskriftasöfnunina. „Eftir að hafa eytt töluverðum tíma við lestur innritunarreglna flestra bæjarfélaga á landinu hef ég komist að þeirri niðurstöðu að ekkert bæjarfélag býður börnum leikskólapláss fyrst þegar þau hafa náð 30 til 31 mánaða aldri. Þarna erum við að tala um börn fædd í janúar og febrúar. Öll bæjarfélög virðast gera allt sem í þeirra valdi stendur til að bjóða þessum börnum leikskólapláss fyrr, eða allt frá 6 mánaða, en yfirleitt 18 mánaða aldri.“ Margrét hvetur íbúa til að skrifa undir áskorunina til bæjaryfirvalda því barnafólk á Akranesi situr eftir þegar kemur að þjónustu bæjarfélagsins bæði hvað varðar aldur við innritun á leikskóla og lágar niðurgreiðslur.

Nánari upplýsingar og rökstuðning með áskoruninni má lesa á síðunni:

http://www.ipetitions.com/petition/askorun-til-baejaryfirvalda-a-akranesi

Mótmæla lágum niðurgreiðslum og háum aldri við innritun í leikskóla