Óvissustigi lýst yfir vegna Kötlu

Ríkislögreglustjórinn, í samráði við lögreglustjórann á Suðurlandi, ákvað um helgina að virkja „Viðbragðsáætlun vegna eldgoss undir Mýrdalsjökli“ á óvissustigi. Jarðskjálftahrina hófst um hádegisbilið 29. september og stóð um helgina enn yfir. „Vísindaráð almannavarna telur líklegt að hrinan stafi af kvikuhreyfingum í Kötlu, en enn hafa engin merki um gosóróa mælst. Eftirfarandi atburðarrásir eru taldar líklegastar:  Jarðskjálftahrinan hættir án frekari atburða, jökulhlaup kemur fram í ám vegna minniháttar eldgoss eða tæmingar á jarðhitakötlum eða að eldgos hefjist í Mýrdalsjökli sem nær að brjóta sér leið í gegnum jökulinn. Afleiðingar gætu verið jökulhlaup í ám sem renna frá jöklinum ásamt öskufalli.“ Að framansögðu er varað við ferðum í og við jökulár sem renna frá Mýrdalsjökli. Sérstaklega má tiltaka Múlakvísl og Jökulsá á Sólheimasandi. Óvissustig almannavarna þýðir að aukið eftirlit er haft með atburðarás sem á síðari stigum gæti leitt til þess að heilsu og öryggi fólks, umhverfis eða byggðar verði ógnað. Að lýsa yfir óvissustigi er hluti af verkferlum í skipulagi almannavarna til að tryggja formleg samskipti og upplýsingagjöf á milli viðbragðsaðila.

 

Líkar þetta

Fleiri fréttir