Harður árekstur varð í Borgarfirði á tólfta tímanum í dag þegar tveir bíla skullu saman á þjóðvegi 1, Vesturlandsvegi, til móts við bæinn Gufuá í Borgarhreppi. Mikill viðbúnaður viðbragðsaðila er vegna árekstrarins og er umferð nú stýrt framhjá slysstað.

Uppfært kl. 12:36

Slysið varð með þeim hætti að sjúkrabíll í forgangsakstri á suðurleið lenti á jeppling. Kastast báðir bílar út af veginum við höggið og jepplingurinn valt. Alls voru fjórir í sjúkrabílnum, þar af einn sjúklingur, og tvennt í jepplingnum.

Fjölmennt lið viðbragðsaðila var kallað á vettvang og öllum sex sem voru í bílunum var komið undir læknishendur. Þar af voru tveir taldir mest slasaðir og flaug þyrla Landhelgisgæslunnar til móts við sjúkrabíl, sótti annan þeirra og flutti til Reykjavíkur.

Nánari upplýsingar um líðan fólksins liggja ekki fyrir að svo stöddu. Um nánari tildrög slyssins vill lögregla ekki tjá sig að svo stöddu.

Búið er að opna fyrir umferð um veginn að nýju, en henni stýrt. Vegfarendur eru hvattir til að fara varlega.

Frá vettvangi slyssins. Lokað var fyrir umferð meðan sjúkraflutningamenn, slökkvilið og lögregla unnu á vettvangi slyssins. Ljósm. bgk.

Uppfærð frétt: Harður árekstur í Borgarfirði