Nýsmíðin Akurey AK-10 var sjósett hjá Celiktrans skipasmíðastöðinni í Istanbul í Tyrklandi í dag. Eiríkur Jónsson, skipstjóri á Sturlaugi H. Böðvarssyni AK, var um borð þegar skipinu var rennt á flot, en hann skipstjóri á Akurey. Á vef HB Granda segir að skipið sé nýsmíði nr. CS 48 hjá skipasmíðastöðinni Celiktrans í Istanbul Tyrklandi og er skipið annar ísfisktogarinn af þremur, sem smíðaður er hjá tyrknesku stöðinni fyrir HB Granda. Áður hafði Celikstrans smíðað uppsjávarskipin Venus NS og Víking AK fyrir félagið.

Að sögn Þórarins Sigurbjörnssonar, sem haft hefur eftirlit með skipasmíðinni í Tyrklandi fyrir HB Granda, hófst smíði Akureyjar síðastliðinn vetur. Smíði ýmissa stálhluta eða svokallaðra blokka hófst um haustið 2015 en kjölur var formlega lagður að skipinu snemma árs 2016. Framdrifsbúnaður skipsins er kominn um borð ásamt spilum og fleiri hlutum. Hafist verður handa af fullum krafti við frágang á rafmagni, rörakerfum, íbúðum o.fl. nú eftir sjósetninguna.

Í frétt HB Granda segir um helsta búnað og stærðir í skipinu:

Heildarlengd: 54.75 m.

Breidd: 13.50 m.

Særými u.þ.b. 1830 tonn.

Stærð á lest 815 rúmmetrar.

Stærð aðalvélar 1799 kW.

Þvermál skrúfu 3800 mm.

Klefar eru fyrir 17 manna áhöfn. Allir eru þeir eins manns utan einn sem er stærri.

,,Smíðahraði þessa skips er talsvert meiri en á Engey RE, sem senn verður tilbúin til afhendingar, enda er um raðsmíði að ræða. Áætluð afhending á Akurey er á fyrri hluta ársins 2017. Öllum frágangi neðansjávar er lokið, eins og frágangi á botnstykkjum, skrúfubúnaði, stýri og fleiru. Þegar öllum frágangi um borð verður lokið verður skipið klárt til reynslusiglingar,“ segir Þórarinn Sigurbjörnsson. Eftir heimkomuna hingað til lands verður síðan settur ýmiss búnaður í borð um skipið, þar á meðal mjög fullkominn kælibúnaður frá Skaganum á Akranesi.

Akurey AK-10 sjósett í Tyrklandi