Úrskurðarnefnd umhverfis- og auðlindamála kvað síðastliðinn föstudag upp þann úrskurð að breytt deiliskipulag fyrir nýbyggingar við Borgarbraut 57-59 í Borgarnesi væri ekki í samræmi við aðalskipulag og felldi skipulagið úr gildi. Framkvæmdir á byggingarstað voru samdægurs stöðvaðar og nú tekur við vinna við breytingu á aðal- og deiliskipulagi sem vafalítið mun taka nokkra mánuði. „Ákvörðun sveitarstjórnar Borgarbyggðar frá 14. apríl 2016 um að samþykkja breytt deiliskipulag fyrir lóðirnar 55-59 er felld úr gildi,“ sagði orðrétt í úrskurði nefndarinnar. Úrskurðarnefndin vísaði hins vegar frá að taka afstöðu til ákvörðunar byggingarfulltrúa Borgarbyggðar frá 26. apríl og 8. júlí sl. að veita leyfi fyrir jarðvegsvinnu og sökkulvinnu á lóðunum, en framkvæmdir við byggingar á lóðinni hófust í sumar og byrjað var að reisa þar húseiningar fimmtudaginn 15. september, eins og fram hefur komið í Skessuhorni.
Það voru tveir aðilar sem lögðu inn kæru til úrskurðarnefndarinnar vegna ákvörðunar sveitarstjórnar um að heimila byggingu á lóðunum Borgarbraut 57-59 og kærðu breytt deiliskipulag. Annars vegar var það Borgarland, eigandi lóðanna við Borgarbraut 56-60, og hins vegar Arinbjörn Adlawan Hauksson Helgugötu 10, en foreldrar hans eiga fasteignina Kveldúlfsgötu 2a, næstu lóð norðan við byggingareitinn við Borgarbraut 57-59. Úrskurðarnefndin vísaði frá kæru Arinbjarnar, en ógilti eins og fyrr segir ákvörðun sveitarstjórnar um breytt deiliskipulag.

Skipulagsvinna unnin eins hratt og hægt er
Gunnlaugur A Júlíusson sveitarstjóri Borgarbyggðar harmar þessa niðurstöðu Úrskurðarnefndar og segir forsvarsmenn sveitarfélagsins ekki hafa búist við þessari niðurstöðu. „Breytingin á deiliskipulagi svæðisins hefur verið staðfest tvisvar en gerðar voru breytingar á því með hliðsjón af athugasemdum sem bárust frá Skipulagsstofnunar. Því kom þessi niðurstaða okkur á óvart,“ sagði Gunnlaugur í samtali við Skessuhorn. Um framvindu málsins í ljósi stöðunnar sagði sveitarstjórinn að framkvæmdir á byggingareitnum hafi strax á föstudaginn verið stöðvaðar. „Nú tekur gamla deiliskipulagið aftur gildi og breytingin sem sveitarstjórn var búin að samþykkja gengur til baka.“ Gunnlaugur segir að heildar byggingarmagn á lóðunum sé undir leyfilegum mörkum, en byggingamagn er yfir mörkum á lóðum 57 og 59, en talsvert undir mörkum á lóð 55. „Við hjá sveitarfélaginu höfum nú þegar hist og farið yfir stöðuna til að glöggva okkur á framhaldinu, en okkar von er að verkið tefjist sem minnst. „Nú tekur við skipulagsleg yfirferð málsins. Fara verður yfir hver er ástæðan fyrir að deiliskipulagið er fellt úr gildi og hvernig bregðast skuli við því. Fyrst og fremst er þetta skipulagsvinna, yfirferð á aðal- og deiliskipulagi sem augljóslega þarf að gera breytingar á. Það allt mun taka ákveðinn tíma í auglýsingaferli en við reynum að flýta ferlina eins og framast er unnt,“ segir Gunnlaugur. Aðspurður segist hann ekki geta svarað því hvernær framkvæmdir geti hugsanlega hafist að nýju á byggingareitnum. Töfin mun augljóslega verða í mánuðum talin jafnvel þótt skipulagsbreytingar verði unnar eins hratt og auðið verður.

Sjá úrskurð í heild sinni:

Úrskurður ÚUA um deiliskipulag við Borgarbraut 57-59

Úrskurðarnefnd fellir úr gildi breytt deiliskipulag í Borgarnesi